Եվրոպայի խորհրդի Տարածաշրջանային և փոքրամասնությունների լեզուների եվրոպական խարտիայի շրջանակներում փորձագետների կոմիտեի հրապարակած զեկույցում առաջընթաց է գրանցվել Կիպրոսում փոքրամասնությունների լեզուների պահպանման ոլորտում, սակայն նշվում է, որ հայերենի ու մարոնիտ արաբերենի ուսուցումն ու հեռարձակումները պետք է առավել ուժեղացվեն:
Կիպրոսն առաջընթաց է գրանցել հայերենի պաշտպանության ոլորտում
ՍՏԵՓԱՆԱԿԵՐՏ, ապրիլի 10, ԱՐՑԱԽՊՐԵՍ: Կիպրոսում ազգային փոքրամասնությունների լեզուների նկատմամբ ընդհանուր մթնոլորտը շատ դրական է գնահատվում: Չնայած բյուջետային սահմանափակումներին՝ բարելավել է հայերեն ու կիպրական մարոնիտ արաբերենի կանոնադրության դրույթների իրականացումը:
Կիպրոսի իշխանությունները նաև միջոցներ են ձեռնարկել հայ և մարոնիտ փոքրամասնությունների մասին իրազեկության բարձրացման համար՝ ներառյալ մշակութային միջոցառումների աջակցության միջոցով: Այս երկու փոքրամասնություններն էլ ներկայացված են Կիպրոսի խորհրդարանում:
Նշվում է, որ հայերենն ուսուցանվում է նախադպրոցական ու ցածր դասարաններում: Ամեն օր հեռարձակվում է հայերեն ռադիոհաղորդում: Սակայն հայերեն չի ուսուցանվում բարձր դասարաններում ու Կիպրոսի հեռուստատեսությամբ չկան հայերենով ծրագրեր:
ԵԽ փորձագետները Կիպրոսի իշխանություններին կոչ են անում առավել զարգացնել հայ և կիպրական մարոնիտ արաբերենի պաշտպանությունը՝ իրականացնելով ուսուցիչների վերապատրաստումներ ու հեռարձակման մեջ ապահովելով լեզուների պատշաճ ներկայացվածություն:
