Համազգային հայ կրթական և մշակութային միության Արցախի գրասենյակի նախաձեռնությամբ այսօր Արցախի պետական համալսարանում տեղի է ունեցել «Արցախում պետականության վերակերտում (1917թ․ դեկտեմբեր-1918թ․ հուլիս).պատմագիտական և քաղաքագիտական հայեցակետեր» թեմայով գիտաժողով՝ նվիրված Արցախում պետականության վերակերտման 100-ամյակին:
ԱրՊՀ-ում կայացել է Արցախում պետականության վերակերտման 100-ամյակին նվիրված գիտաժողով
ՍՏԵՓԱՆԱԿԵՐՏ, ապրիլի 20, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ գիտաժողովի մասնակիցները նախ ծաղիկներ են խոնարհել Արցախյան ազատամարտում ԱրՊՀ-ի զոհված ուսանողների հիշատակը հավերժացնող հուշաքարին, այնուհետև մասնակցել գիտաժողովի լիագումար նիստին:
Գիտաժողովին ԱՀ Ազգային Ժողովի փոխնախագահ, պատմական գիտությունների դոցենտ, պրոֆեսոր Վահրամ Բալայանն ասել է, որ 2018 թվականը հայության համար հոբելյանական է, որի շրջանակներում էլ կազմակերպվել է այս գիտաժողովը:
«Մենք Արցախում ունեցել ենք պետականություն, որը ոչ մի կապ չի ունեցել Ադրբեջանի հետ և երբեք չի եղել Ադրբեջանի կազմում: Պետք է հնարավորություն ստեղծենք և առատ նյութ տրամադրենք մեր դիվանագետներին, քաղաքական գործիչներին, որ իրենք այս ամենը ներկայացնեն միջազգային հանրությանը»,-ասել է Վ. Բալայանը:
Նա նշել է նաև, որ նմանօրինակ միջոցառումները պետք է ծառայեցվի երկու հայկական պետությունների կայացման ու զարգացման գործին: Գիտաժողովներում ձեռք բերված մտքերն ու գաղափարները կիրառելի պիտի դարձվի առօրյայում. այս գիտաժողովն էլ հենց նման նպատակ է հետապնդում:
ԱՀ կրթության, գիտության և սպորտի նախարար Նարինե Աղաբալյանն էլ ասել է, որ պատմական իրադարձությունները գլոբալ քաղաքականության համատեքստում դիտարկելը կարևոր է նաև նոր մարտահրավերները ճիշտ գնահատելու և արդյունավետ ռազմավարություն մշակելու տեսանկյունից:
Նախարարի խոսքով՝ այն սերունդը, ում բախտ է վիճակվել վերականգնելու հայոց պետականությունը, նաև մեծ պատասխանատվություն է ստանձնել այն պահպանելու և հզորացնելու համար:
«Այդ պատասխանատվության կրողը նաև նոր սերունդն է, որը պիտի կարողանա ամենաթանկ գնով ձեռք բերվածը՝ անկախ պետականությունը չվտանգել ու պաշտպանել այն ցանկացած ոտնձգությունից: Մեր պետականության վերականգնման 100-ամյակի շեմին ենք հասել 2 հայկական հանրապետություններով և մեկ միացյալ հայրենիքով»,-մասնավորապես ասել է Ն. Աղաբալյանը:
ԱՀ մշակույթի, երիտասարդության հարցերի և զբասաշրջության նախարար Սերգեյ Շահվերդյանն իր խոսքում նշել է, որ 1929 թվականին ստեղծված Համազգային հայ կրթական և մշակութային միությունը 90 տարիների ընթացքում մեծածավալ գործունեություն է ծավալել Սփյուռքում հայկականությունը պահպանելու և տարածելու գործում և մեկ տարի առաջ այն իր արցախյան գրասենյակն է բացել Ստեփանակերտում, որն էլ այսօր իրականացնում է այս գիտաժողովը: Կարևորելով գիտաժողովի թեման՝ Ս. Շահվերդյանն ըստ էության նշել է, որ Արցախը միակ հայկական տարածքն է, որ պահպանել է պետականության մնացորդները մինչև ռուսական կայսրության մեջ մտնելը:
Համազգային հայ կրթական և մշակութային միության կենտրոնական վարչության անդամ Սպարտակ Ղարաբաղցյանը կարևորել և անհրաժեշտ է համարել նման գիտաժողվների կազմակերպումը, որտեղ մեկ անգամ ևս անդրադարձ է կատարվում պատմական կարևոր իրողություններին:Նա ներկայացրել է նաև Համազգային հայ կրթական և մշակութային միության վարչության ուղերձը գիտաժողովի անդամներին: Այնտեղ մասնավորապես ասվում է. «Այս միջոցառմամբ մենք նպատակ ենք ունեցել գիտական հայացք ուղղել հայոց ազգային-ազատագրական պայքարին, որն սկսվել է 100 տարի առաջ:Լիահույս ենք, որ գիտաժողովը հասնելու է իր նպատակին և գրանցելու է շոշափելի արդյունքներ»:
Համազգային հայ կրթական և մշակութային միության Ստեփանակերտի գրասենյակի ներկայացուցիչ Հերմինե Ավագյանի կարծիքով էլ գիտաժողովը նպատակ ունի ներկայացնելու և արժևորելու պատմական կարևոր այն իրադարձությունը, որն է Արցախի պետականաշինության վերակերտման 100-ամյակը:
Ըստ նրա՝ պատմությունն անժխտելի իրողություն է, և այդ իրողության մասին պետք է անընդհատ խոսել բարձր ատյաններում՝ ի հակադարձումն ադրբեջանական քարոզչության:
Լիագումար նիստից հետո գիտաժողովի աշխատանքները շարունակվել են առանձին մասնախմբերում: