ԱՀ գյուղատնտեսության նախարարությունում այսօր տեղի է ունեցել Արցախի և Հայաստանի սննդի անվտանգության պետական ծառայությունների (ՍԱՊԾ) համատեղ մամլո ասուլիսը:
Պարտադիր սպանդանոցային մորթին անցումն առաջնահերթ խնդիրներից է. ՀՀ ՍԱՊԾ պետն Արցախում հանդես է եկել մամլո ասուլիսով
ՍՏԵՓԱՆԱԿԵՐՏ, ապրիլի 20, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ ՀՀ ՍԱՊ ծառայության պետ Իշխան Կարապետյանն ասել է, որ իրենց այցն պայմանավորված է Արցախի գործընկեր կառույցի հետ համագործակցելու, առաջիկայում իրականացվող ծրագրեր քննարկելու և համատեղ միջոցառումների ձևաչափերը նախագծելու նպատակով:
Նրա խոսքով՝ ոլորտում առաջնահերթ խնդիրներից է համարվում պարտադիր սպանդանոցային մորթին անցումը, որն Արցախում կիրականացվի փուլ առ փուլ:
Ըստ Ի. Կարապետյանի՝ սպանդանոցային մորթը հնարավորություն է տալու ապահովել սպառողներին տարատեսակ հիվանդություններից և ռիսկերից:
Մսի իրացման կետերի, վաճառքի պայմանները բարելավելու ուղղությամբ առաջիկայում ևս մի շարք համատեղ աշխատանքներ են իրականացվելու:
«Մենք ՀՀ-ում իրականացնում ենք նաև թե՛ հաց և թե՛ միս տեղափոխող տրանսպորտային միջոցների սանիտարական անձնագրերի տրամադրում: Փորձը և ուսումնասիրությունները ցույց են տալիս, որ այդ ոլորտը ևս առաջնային կարգավորման անհրաժեշտություն ունի: Գտնում եմ, որ այն պետք է իրականացվի նաև Արցախում»,-ասել է ՀՀ ՍԱՊԾ պետը:
Ըստ նրա՝ ԱՀ ՍԱՊ ծառայության հետ իրենց առաջին քայլերը լինելու են մասնագետների վերապատրաստումները և ոլորտում տեխնիկական հագեցվածության ապահովումը:
Համագործալցության ընթացքում իրականացնելու են նաև գլոբալ խնդիրներ, որոնք են՝ կենդանիների համարակալումը, ռեյտինգավորումը, ռիսկերի գնահատումը, մոնիթորինգային ծրագրերի իրականացումը:
Ի. Կարապետյանն ավելացրել է, որ պետք է համատեղ աշխատանքների արդյունքում հնարավորինս կարճ ժամանակում իրականացնենք վերոնշյալ հարցերի արդյունավետ ուսումնասիրությունը:
ԱՀ ՍԱՊԾ պետ Համլետ Ապրեսյանն էլ իր խոսքում ասել է, որ այս հանդիպումը համատեղ սերտ համագործակցության մեկնարկն է, որը կխթանի երկու կառույցների առջև ծառացած խնդիրների լուծմանը:
Նա նշել է նաև, որ իրենք պատրաստակամ են, սննդի անվտանգության ոլորտին վերաբերող ՀՀ-ում գործող օրենքներն Արցախում ևս ներդնելու և իրականացվող աշխատանքներում լինել հետևողական: