Ապրիլի 20-22-ը Երևան քաղաքում ընթացող «Ինտուր Էքսպո» միջազգային զբոսաշրջային ցուցահանդեսին ներկայացված է նաև Արցախը:
Արցախը ներկայացվում է «Ինտուր Էքսպո» միջազգային զբոսաշրջային ցուցահանդեսում
ՍՏԵՓԱՆԱԿԵՐՏ, ապրիլի 20, ԱՐՑԱԽՊՐԵՍ: «Արցախպրես»-ի թղթակցի հետ զրույցում ԱՀ մշակույթի, երիտասարդության հարցերի և զբոսաշրջության նախարարության զբոսաշրջության վարչության պետ Արտակ Գրիգորյանն ասել է, որ առանձին տաղավարի ներքո Արցախում գործող 5 զբոսաշրջային ընկերություններ և հյուրանոցային տնտեսության օբյեկտներ իրենց ծառայությունները և զբոսաշրջային պրոդուկտը ներկայացնում են հաճախորդներին և գործընկերներին։
Նրա խոսքով՝ ԱՀ մշակույթի, երիտասարդության հարցերի և զբոսաշրջության նախարարության պատվիրակության անդամները ցուցահանդեսի այցելուներին են փոխանցում Արցախի գրավչությունների վերաբերյալ տեղեկություններ՝ անվճար բաժանելով համապատասխան գրականություն։
«Ընդհանուր առմամբ, Արցախի տաղավարը ցուցահանդեսում մեծ հետաքրքրություն է առաջացնում այցելուների և մասնակիցների շրջանում։ Նման միջոցառումների կազմակերպումը հայկական զբոսաշրջային արդյունքի ներկայացման կոնտեքստում շատ կարևոր է»,-նշել է Ա. Գրիգորյանը։