Գյուղատնտեսության զարգացման նոր ռազմավարությունը ունի գյուղատնտեսության զարգացման տարածքային և գոտիական առանձնահատկություններին համապատասխան սկզբունք, որի շրջանակներում մենք հանրապետության տարածքը դիտարկելու ենք ոչ թե սահմանված վարչատարածքային միավորումների, այլ առանձին գոտիների համատեքստում:
Առաջիկայում կունենանք բոլոր տարածքների գյուղատնտեսական բնութագրերը կամ անձնագրերը. գյուղնախարար
ՍՏԵՓԱՆԱԿԵՐՏ, ապրիլի 20, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին ապրիլի 19-ին կայացած ԱԺ լիագումար նիստի ժամանակ ասել է ԱՀ գյուղատնտեսության նախարար Ժիրայր Միրզոյանը՝ պատասխանելով «Հայրենիք» խմբակցության պատգամավոր Արմեն Օհանյանի այն հարցին, թե նախարարության մասնագետներն արդյո՞ք ուսումնասիրում են քաղաքացու կողմից ընտրված հողատարածքները և հաշվի է առնվում՝ բնակլիմայական պայմանները համապատասխանու՞մ են տվյալ ծառատնկմանը, թե ոչ:
Հարցին ի պատասխան՝ Ժ. Միրզոյանը նշել է, որ այգեգործության ոլորտում պետական աջակցությունը հողօգտագործողը ստանում է այգին տնկելուց հետո, որը կաթիլային համակարգի տրամադրումն է` 50 տոկոս դրամաշնորհի, 50 տոկոս անտոկոս փոխառության տեսքով:
«Այգի տնկելու պահին գյուղնախարարությունը որևէ միջամտություն չունի: Յուրաքանչյուրն ազատ է իր հողատարածքում: Գյուղնախարարության աջակցությունը կաթիլային համակարգի տեղադրման գործընթացում նպատակաուղղված է այդ այգուն արտադրական նշանակություն տալուն: Գյուղատնտեսության մեջ տարածքային և գոտիական առանձնահատկությունները վեր հանելը լինելու է մեր հիմնական ռազմավարական ուղղություններից մեկը: Այդ նպատակով նախարարությունը նախաձեռնել է մի գործընթաց, որի արդյունքում նախատեսվում է մոտ մեկ տարվա մեջ ունենալ բոլոր տարածքների գյուղատնտեսական բնութագրերը կամ անձնագրերը»,- մանրամասնել է Ժ. Միրզոյանը: