«Հայաստան» համահայկական հիմնադրամի՝ այս տարվա ծրագրով նախատեսված 37 խորքային հորերի կառուցման տարածքներն ընտրվել են՝ հաշվի առնելով տվյալ տարածքի ջրահավաք թասի մեծությունը, ջրաթափանցելիությունը, հողի շերտը և տվյալ տարածքում գյուղատնտեսությունը զարգացնելու հնարավորությունը:
Կուսումնասիրվի Արցախի ստորգետնյա ջրերի պաշարները. գյուղնախարար
ՍՏԵՓԱՆԱԿԵՐՏ, ապրիլի 21, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին ԱԺ լիագումար նիստի ժամանակ ասել է ԱՀ գյուղատնտեսության նախարար Ժիրայր Միրզոյանը՝ պատասխանելով «Շարժում-88» խմբակցության պատգամավոր Վիլեն Սաֆարյանի այն հարցին, թե, հաշվի առնելով Արցախի տարածքի կառուցվածքի երկրաբանական առանձնահատկությունները և խորքային ռեսուրսների ավազանի ջրային ռեսուրսների արդյունավետ օգտագործումը, արդյո՞ք նախատեսվում է օգտագործել ժամանակակից նորագույն գերֆիզիկական ուսումնասիրման մեթոդներ՝ խորքային հորերի տեղի ընտրության հարցում խուսափելով վրիպելուց:
Հարցին ի պատասխան՝ ԱՀ գյուղատնտեսության նախարարը նշել է, որ 37 խորքային հորերի համար փորձել են ընտրել այնպիսի տարածքներ, որտեղ նախկինում ևս եղել են խորքային հորեր, որպեսզի հնարավորինս զերծ մնան այնպիսի դեպքերից, որոնք առաջ կբերեն ջրային ռեսուրսների անբավարարություն:
«Ունենք մի քանի փորձեր, որտեղ ջրային համապատասխան պաշարները բավարար չեն եղել: Առաջիկայում փորձելու ենք ՀՀ համապատասխան գիտական հաստատությունների հետ մշակել կամ ստեղծել աշխատանքային խումբ՝ հանրապետության ամբողջ տարածքի ստորգետնյա ջրերի պաշարները ուսումնասիրելու համար»,- ավելացրել է Ժ.Միրզոյանը: