Զինված ուժերում կարևոր տեղ են զբաղեցնում անձնակազմի հետ տարվող աշխատանքները, որոնք առանձնանում են իրենց ձևերով և մեթոդների բազմազանությամբ: Դրանց նպատակն է ձևավորել և զարգացնել զինծառայողին որպես քաղաքացի, հայրենասեր անհատ, ով միշտ ձգտում է կատարելագործման՝ որպես հայրենիքի պաշտպան, անկախ զբաղեցրած դիրքից՝ շարքային է, սերժանտ, թե` սպա:
Հայրենիքի պաշտպանությունը բոլորիս պարտքն է
ՍՏԵՓԱՆԱԿԵՐՏ, ապրիլի 25, ԱՐՑԱԽՊՐԵՍ-ՄԱՐՏԻԿ: Զինվորի բարոյահոգեբանական վիճակի, բանակ-հասարակություն կապի մասին հարցազրույց ունեցանք Պաշտպանության բանակի Ն զորամասի հրամանատարի` ԱՀՏԱ գծով տեղակալ, փոխգնդապետ Արա Քամալյանի հետ:
-Պարոն փոխգնդապետ, Դուք համակարգում եք զորամասի անձնակազմի հետ տարվող դաստիարակչական աշխատանքները: Ինչպիսի՞ն է այսօրվա զինվորի բարոյահոգեբանական վիճակը:
-Զինվորի բարոյահոգեբանական վիճակը գնահատում եմ կայուն: Այսօր առավել քան երբևէ նա պաշտպանված է թե մարտական դիրքում՝ ինժեներական կահավորվածությամբ, թե զենք-զինամթերքի ապահովվածությամբ: Ամենակարևորը՝ նրա մարտական ոգին բարձր է: Զորամասում պատշաճ մակարդակի վրա են գտնվում անձնակազմի հետ տարվող դաստիարակչական աշխատանքները: Ունենք «Մոնթե» ամսաթերթ, բացի դրանից, սպայական, սերժանտական ժողովներում կատարվում են քննարկումներ տարբեր հարցերի շուրջ:
Անձնակազմի հետ աշխատանքներ ենք տանում ժամանակակից տեխնիկական միջոցներով` հակառակորդի ներազդեցությունից խուսափելու համար: Միջոցներ ենք ձեռնարկում, որպեսզի զինվորները խուսափեն կասկածելի կայքէջերից, չշփվեն անծանոթ, կասկածելի անձանց հետ, հեռախոսազանգերի ընթացքում հարազատների հետ չքննարկեն ծառայությանը վերաբերող հարցեր:
Զինվորի բարոյահոգեբանական վիճակը բարձր է պահում նաև ծնողների, հարազատների և հասարակության հետ կապը: Մեր զինվորներն ազատ արձակման ժամանակ հնարավորություն են ստանում տեսազանգերի միջոցով կապ հաստատել հարազատների հետ:
-Ի՞նչ դժվարությունների եք հանդիպում նորակոչիկների հետ տարվող աշխատանքներում:
-Դժվարությունների այնքան ենք հանդիպել, որ «մարզվել» ենք, ուստի հեշտությամբ հաղթահարում ենք դրանք: Բանակ են զորակոչվում տարբեր ընտանիքներում դաստիարակված, տարբեր ավանդույթներ, կրթություն, դավանանք ունեցող նորակոչիկներ: Իհարկե, նրանց պետք է ուղղորդել մի ուղղությամբ, իսկ դա հեշտ չէ: Նշեմ նաև, որ լուրջ դժվարությունների առաջ չենք կանգնում, քանի որ մենք համախմբված ենք մեկ նպատակի շուրջ, որն էլ առաջնորդում է պաշտպանել հայրենիքը:
-Հավանաբար հաշվի է առնվում նաև մեր երկրի ոչ պատերազմ, ոչ խաղաղություն վիճակը…
-Բանակը մի կառույց է, որը պետք է միշտ լինի գերազանց պատրաստվածության մակարդակի՝ անկախ երկրում տիրող վիճակից: Եթե ծառայության ընթացքում մտածենք ֆիզիկական ծանրաբեռնվածության ու կարոտի մասին, ապա ոչնչի չենք հասնի: Մեր գերակա խնդիրը սահմանի ամրությունն է: Մենք միշտ պատրաստ ենք պատերազմական իրադրության:
-Մեր երկիրն ունեցել է պատմական ոչ դյուրին ճանապարհ, և անչափ կարևոր է զինվորի մարտունակության բարձրացման համար սեփական երկրի պատմության իմացությունը: Ի՞նչ աշխատանքներ եք կատարում զինվորների հետ «Արցախյան շարժում 30-ի» շրջանակներում:
-Իհարկե, շատ կարևոր է մեր պատմության, ազգի անցած ճանապարհի իմացությունը, քանի որ ժամանակակից մարտավարությունն իր բոլոր դժվարություններով և տեխնիկական միջոցներով կարող է ապաքողարկել և թյուրիմացություն ստեղծել սերնդի գիտակցության մեջ, ուստի անհրաժեշտ է, որ սերունդներն իմանան մեր պատմության բոլոր դրվագների, բախտորոշ շրջանների, ճակատամարտերի, մեր հերոսների ու նրանց կատարած սխրանքների մասին: Թեմայի շրջանակներում զորամասում տեղեկատվական ժամերին հանդես ենք գալիս ԱՀՏԱ բաժնի կողմից մշակված հատուկ թեմաներով, ինչպես նաև «Մարտիկ» և «Հայ զինվոր» թերթերում լուսաբանվող նյութերի շուրջ կատարում ենք քննարկումներ: Նշեմ նաև, որ փետրվարի 21-ին զորամասի մարտական հերթապահություն անցկացնող և նորակոչիկների մեկական վաշտ մասնակցել են Ճարտարում կազմակերպված Արցախյան շարժման 30-ամյակին նվիրված միջոցառմանը: Ելույթներով հանդես են եկել շնորհալի զինծառայողները:
-Բանակ-հասարակություն կապն ամրապնդելու համար ինչպիսի՞ միջոցառումներ եք կազմակերպում:
-Զորամասը համագործակցում է շրջվարչակազմի կրթության և սպորտի, մշակույթի և երիտասարդության բաժինների հետ: Ունենք ենթաշեֆ 19 դպրոց: Հաճախակի ենք կազմակերպում այցելություններ, անցկացնում ինտելեկտուալ խաղեր, ռազմամարզական միջոցառումներ, հրաձգություններ: Այցելությունների ժամանակ դպրոցականները ծանոթանում են զենքերին, զորանոցին, զինվորական սննդին ու առօրյային: Բանակ-հասարակություն կապի ամրապնդման շրջանակներում Հայրենյաց պաշտպանի օրվան նվիրված համերգային ծրագրով փետրվարի 22-ին զորամաս են ներկայացել Մարտունու մշակույթի կենտրոնի ներկայացուցիչները, իսկ փետրվարի 23-ին զորամասի շնորհաշատ զինծառայողները համերգային ծրագրով հանդես են եկել Մարտունու մշակույթի և երիտասարդության պալատում: Նման հանդիպումները դրական են ազդում զինվորների ծառայության ընթացքին, նրանց բարոյահոգեբանական վիճակին, էլ ավելի բարձրացնում սերն առ հայրենիք:
Անուշ Ասրիբաբայան
ք. Մարտունի