ԱՀ գրողների միության նախաձեռնությամբ այսօր Գրիգոր Նարեկացի համալսարանում կայացել է Կոմիտաս Հակոբյանի «Գոյության պատրանք» գրքի շնորհանդեսը:
Ստեփանակերտում կայացել է Կոմիտաս Հակոբյանի «Գոյության պատրանք» գրքի շնորհանդեսը
ՍՏԵՓԱՆԱԿԵՐՏ, մայիսի 4, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ խոսելով Կոմիտաս Հակոբյանի ստեղծագործությունների մասին՝ ԱՀ գրողների միության նախագահ, գրքի խմբագիր Վարդան Հակոբյանն ասել է, որ դրանք անկրկնելի գործեր են:
Վ. Հակոբյանը նշել է, որ Կոմիտասն իր ստեղծագործություններով ընթերցողի համար միշտ էլ կմնա, որպես առաջնակարգ գրող: Կոմիտաս Հակոբյանն Արցախի ամենաարցախցի երգիչն ու բանաստեղծն է դարձել, հայ ժողովրդի ամենավճռական գոյամարտի սխրանքը մարմնավորող դպիրը. Կոմիտասի խոսք ու տաղից մշտապես լույս է ելնում:
Իսկ բանաստեղծ Սոկրատ Խանյանն էլ ասել է, որ Կոմիտասն իր ունեցած բոլոր կորուստների մեջ առանձնահատուկ տեղ է գրավում:Կոմիտասի երգը ծնունդ է հոգու և սրտի՝ ակունքված հող հայրենիից և հայրական օջախից:
«Իր երգերում և կյանքում Կոմիտասը նույնն է. նրա երգն արձագանքն էր այն երազի ու ցավի, ինչ ստացել էր նա՝ գերված Արցախ լեռնաշխարհից: Ահա թե ինչու պատերազմի հենց առաջին օրվանից Կոմիտասն առանց վարանելու զինվորագրվեց Արցախի անկախության և ազատության պայքարին՝ կամովին իր կյանքը դնելով հայրենիքի փրկության զոհասեղանին»,-նշել է Ս. Խանյանը:
Գրիգոր Նարեկացի համալսարանի հայոց լեզվի և գրականության ամբիոնի դասախոս Ամալյա Գրիգորյանի խոսքով էլ գիրքն իր մեջ ամփոփում է հեղինակի բանաստեղծությունները, գրչակից և մարտական ընկերների, ժամանակակիցների հուշերն ու գնահատանքի խոսքերը, ինչպես նաև գրչակիցների բանաստեղծությունները՝ նվիրված Կոմիտաս Հակոբյանին:
Նրա խոսքով՝ մեծ գործ է կատարել նաև լեզվաբան Սիլվա Մինասյանը, ով վերջերս տպագրել է «Կոմիտաս Հակոբյանի ստեղծագործությունների լեզուն և ոճը» աշխատությունը, որտեղ հեղինակը հանգամանորեն քննության է առել Կ. Հակոբյանի ստեղծագործությունների թեմատիկ և լեզվական առանձնահատկությունները:
Շնորհանդեսին ելույթներով հանդես են եկել նաև ԱՀ գրողների միության անդամներ և այլք, իսկ հեղինակի ստեղծագործություններն ընթերցել են Գրիգոր Նարեկացի համալսարանի ուսանողները:
Նշենք, որ Կոմիտաս Հակոբյանը ծնվել է 1972թ. հունիսի 1-ին, ԱՀ Մարտունու շրջանի Քերթ գյուղում` մտավորականի ընտանիքում: 1989-ին ավարտել է տեղի միջնակարգ դպրոցը և ընդունվել Կիրովականի մանկավարժական ինստիտուտի Ստեփանակերտի բաժանմունքի (այժմ Արցախի պետական համալսարան ) բանասիրական ֆակուլտետ: Մինչև կանոնավոր բանակի կազմակերպումը Կ. Հակոբյանը կամավոր մասնակցել է պաշտպանական և ազատագրական մի շարք մարտերի: Հարավ-արևելյան ռազմաճակատում ծավալած գործողությունների ժամանակ՝ 1994 թ ապրիլի 27-ին, անձնազոհության անկրկնելի օրինակ էր նրա կատարած սխրանքը: Կոմիտասը միայնակ և առաջինը մտավ ադրբեջանցիների կողմից գրավված խրամատը: 1994թ մայիս 2-ին Կոմիտասն իր մարտիկների հետ մտնում է Մարտակերտի շրջան: Երեք օր պատերազմելով և գրավելով մի շարք դիրքեր, մայիսի 5-ին, Կարմիրավան գյուղի ազատագրական մարտում հերոսաբար զոհվում է 22-ամյա Կոմիտաս Հակոբյանը: Կոմիտաս Հակոբյանը 2003թ․ հետմահու պարգևատրվել է Արցախի «Արիության համար» մեդալով: