Ղարաբաղյան հակամարտությունն ամենադժվար հակամարտություններից մեկն է, և կարծում եմ՝ այն պետք է գտնի իր լուծումը միայն խաղաղ եղանակով:
Ղարաբաղյան հիմնահարցը լուծելու համար պետք է գտնել Արցախի ամենաուժեղ կողմը. կանադացի դիվանագետ
ՍՏԵՓԱՆԱԿԵՐՏ, մայիսի 11, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին այսօր՝ մայիսի 11-ին, Արցախի պետական համալսարանում ուսանողների հետ կայացած հանդիպմանն ասել է կանադացի վերլուծաբան, դիվանագետ, բանախոս Դերիլ Քոուփլենդը (Daryl Copeland): Բանախոսը նշում է, որ տեղեկացված է ղարաբաղյան հակամարտության մասին՝ սկսած խորհրդային ժամանակներից, մինչև վերջին զարգացումները:
«Հարավային Կովկասը բարդ տարածաշրջան է, և Արցախն ու Հայաստանը ունեն անվտանգության հետ կապված լուրջ խնդիրներ: Հիմնահարցը լուծելու համար պետք է գտնել Արցախի ամենաուժեղ կողմը, այսինքն՝ ունենալ մրցունակ առավելություն: Այս օրերին Երևանում տեղի ունեցածը ես չէի տեսել իմ այցելած 120 երկրներից ոչ մեկում: Կարծում եմ՝ հայերի մրցունակ առավելությունն այն է, որ ունեն նույնականություն և միասնականություն»,- մասնավորապես ասել է կանադացի դիվանագետը:
Դ. Քոուփլենդը 30 տարի աշխատել է Կանադայի արտաքին գործերի նախարարությունում՝ որպես դիվանագետ: Այդ ընթացքում աշխատել է արտաքին գործերի նախարարության դեսպանատներում, մասնավորապես՝ Թայլանդում, Նոր Զելանդիայում, Եթովպիայում, Մալազիայում՝ զբաղեցնելով տարբեր պաշտոններ:
«2015 թվականին Երևանում մասնակցել եմ կոնֆերանսի, որի ժամանակ մեկ շաբաթով այցելել էի Արցախ: Այս օրերին գտնվում էի Երևանում և որոշեցի կնոջս հետ կրկին այցելել Արցախ»,- նշել է Դ. Քոուփլենդը:
Հանդիպման վերջում դիվանագետը պատասխանել է ուսանողների կողմից հնչեցված հարցերին:
