Երևանի քաղաքապետարանի և պաշտպանության նախարարության համագործակցության շրջանակներում հարյուրավոր զինծառայողների ծնողներ հնարավորություն ունեցան հանդիպել իրենց զավակներին:
Երևանի քաղաքապետարանի նախաձեռնությամբ ժամկետային զինծառայողների ծնողները տեսակցել են իրենց զավակներին
ՍՏԵՓԱՆԱԿԵՐՏ, մայիսի 21, ԱՐՑԱԽՊՐԵՍ-ՄԱՐՏԻԿ: ՊԲ կենտրոնական ենթակայությամբ գործող զորամասերում ծառայող իրենց զավակներին ծնողները հանդիպեցին գնդապետ Արտյոմ Առաքելյանի հրամանատարությամբ գործող զորամասում, որտեղ նրանց դիմավորեցին աղ ու հացով, այնուհետև զինծառայողների հարազատները ծաղիկներ խոնարհեցին Արցախյան ազատամարտում նահատակված զինծառայողների հիշատակը հավերժացնող հուշանկյունում:
Հանդիսավոր միջոցառմանը ՊՆ ՌՀԴ ՀԿՀԿ բաժնի պետ, գնդապետ Վրեժ Իշխանյանը կարևորեց նմանատիպ միջոցառումների դերը բանակ-հասարակություն կապի զարգացման և զինծառայողների բարոյահոգեբանական վիճակի ու մարտունակության բարձրացման գործում: «Սիրելի ծնողներ, դուք եկել եք տեսնելու ձեր զավակներին, վայելեք միասին այս երջանիկ ժամերը, ոգևորեք և հույս ու հավատ ներշնչեք մեր զինվորներին: Գաղտնիք չէ, որ բանակի մարտունակության հիմքը զինվորական ամուր կարգապահությունն է, իսկ զինվորական կարգապահությունը չի կարելի պատկերացնել առանց զինվորի ծնողի ակտիվ մասնակցության: Հարգելի ծնողներ, ձեր զավակների հետ հանդիպման այս մի քանի ժամերը օգտագործեք նաև խորհուրդներ ու խրատներ տալով ձեր որդիներին, որ հայրենանվեր իրենց առաքելությունը շարունակեն կատարել պատվով ու արժանապատվությամբ»,-իր խոսքում մասնավորապես ասաց գնդապետ Վ. Իշխանյանը:
Երևանի քաղաքապետարանի սոցիալական ապահովման վարչության պետը կարևորելով օրվա միջոցառումը` վստահեցրեց, որ նմանատիպ միջոցառումները կրելու են շարունակական բնույթ: «Երևանի քաղաքապետարանի նախաձեռնությամբ դեռևս 2013 թվականից իրականացվում է սահմանամերձ շրջաններում ծառայություն իրականացնող զինծառայողների ու նրանց հարազատների տեսակցության ծրագիրը: Այս ծրագրով ավելի քան տասնմեկ հազար ծնողներ հնարավորություն են ունեցել հանդիպել իրենց զավակներին: Ուզում եմ ընդգծել, որ ծրագիրը ոչ միայն սոցիալական նշանակություն, այլ նաև բարոյական հսկայական ներուժ ունեցող ծրագիր է: Մենք մշտապես եղել և լինելու ենք այն ընտանիքների կողքին, որոնց որդիները պաշտպանում են մեր հայրենիքի սահմանները»,-վստահեցրեց Ռուզաննա Զաքարյանը:
Միջոցառման ավարտին Երևանի քաղաքապետարանի կողմից մի շարք զինծառայողներ պարգևատրվել են պատվոգրերով, որից հետո զինծառայողները հնարավորություն ստացան ողջ օրն անցկացնել իրենց հարազատների հետ: «Շատ լավ ծրագիր է, արդեն չորս ամիս է` որդուս չէի տեսել, և սա շատ լավ հնարավորություն էր նրան կրկին հանդիպելու համար: Բոլոր ծնողները անհամբեր սպասում էին այս օրվան: Շնորհակալություն ենք հայտնում կազմակերպիչներին, որ այսպիսի ծրագիր են կյանքի կոչում»,- մեզ հետ զրույցում ասաց Աստղիկ Ներսիսյանը:
Միջոցառումն առանձնահատուկ ուրախություն պարգևեց նաև իրենց ծնողներին անհամբերությամբ սպասող զինվորներին: «Այս ծրագրով բազմաթիվ զինվորներ տեսակցեցին իրենց հարազատներին: Բոլորս էլ շատ էինք կարոտել մեր հարազատներին և անհամբերությամբ սպասում էինք այս երջանիկ օրվան: Մեզ համար շատ կարևոր են այսպիսի միջոցառումները, քանի որ մեր ծնողներին հանդիպելուց հետո ավելի լավ տրամադրությամբ ու պատասխանատվությամբ ենք կատարում մեր ծառայողական պարտականություններն ու հայրենիքի պաշտպանության սուրբ առաքելությունը»,-ասաց շարքային Մհեր Քոքչյանը:
Դավիթ Ավանեսյան
