Այսօր՝ մայիսի 26-ին, Ստեփանակերտի Ալեքսանդր Գրիբոյեդովի անվան համար 3 ռուսական թեքումով դպրոցում 75-րդ անգամ հնչել է «Վերջին զանգ»-ը:

ՍՏԵՓԱՆԱԿԵՐՏ, ապրիլի 26, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ հանդիսավոր միջոցառումը մեկնարկել է Արցախի Հանրապետության դրոշի ներսբերմամբ և պետական օրհներգի հնչեցմամբ: Այնուհետև ներկաները մեկ րոպե լռությամբ հարգել են արցախյան ազատամարտում և ապրիլյան պատերազմի ընթացքում հայրենիքի պաշտպանության համար նահատակված զինվորների հիշատակը:

Շնորհավորելով ներկաներին՝ դպրոցի տնօրեն Լյուդմիլա Հովհաննիսյանն ասել է, որ ավանդական դարձած «Վերջին զանգ»-ն այս տարի յուրահատուկ է տոնվում Արցախում, քանի որ լրացել է Արցախյան շարժման 30-ամյակը՝ դարձնելով տոնը կրկնակի:

««Վերջին զանգ»-ի տոնը միշտ էլ ուղեկցվում է ուրախությամբ և նոր հույսերով: Այսօրվա դպրոցական զանգը մեր 12-րդ դասարանցիների համար կհնչի վերջին անգամ՝ ճանապարհելով նոր, ինքնուրույն և ավելի հետաքրքիր կյանք:

Ցանկացած դպրոցի հարստություն իր աշակերտների հաջողություններն են, և դրանք վերագրվում են նաև դպրոցի ուսուցչական կոլեկտիվին է, ինչի համար շնորհակալություն նրանց»,- ավելացրել է Լ. Հովհաննիսյանը:

Ավարտական դասարանի դասղեկ Կարինե Աթաջանյանն էլ ասել է, որ դպրոցը հրաժեշտ է տալիս նորարար գաղափարներով և մեծ պոտենցիալով երեխաների:

«Դասարանում ամեն մեկը յուրովի առանձնանում էր իր տեսակով: Կարծում եմ՝ այս 12 տարիների ընթացքում դպրոցը նրանց տվել է ինտելեկտուալ մտածողություն և, չնայած ռուսական թեքումին, թողարկում է հայրենասեր աշակերտներ, ովքեր, ռուսաց լեզվին զուգահեռ, նույն չափով էլ տիրապետում են հայերենին»,- ընդգծել է Կ. Աթաջանյանը:

Շրջանավարտ Լիլիա Սարկիսյանն էլ նշել է, որ այսօր հաղթահարեցին իրենց կյանքի առաջին էտապը:

«Դպրոցին, իհարկե, կկարոտեմ: Մենք կապվել ենք ուսուցիչների հետ և դարձել մի ընտանիք: Կցանկանայի բոլոր շրջանավարտներին մաղթել հաջողություն առաջիկայում կայանալիք քննություններին՝ ընտրելու այն մասնագիտությունները, որտեղ կունենան փորձ և կլինեն վստահ»,- ասել է Լ. Սարկիսյանը:

Միանալով դասընկերոջ շնորհավորական խոսքին՝ Ամալ Տալկանչիևան, ով Ղրղզստանից տեղափոխվել է Արցախ, նշել է, որ դպրոցն իր համար ևս դարձել է հարազատ օջախ:

«Ուրախ եմ, որ հնարավորություն ունեցա ծանոթանալու իմ հասակակից նոր աշակերտների հետ: Արցախում ապրելով՝ ես ծանոթացա նաև հայկական ազգային մշակույթին և ավանդույթներին: Այսօր իմ ընկերների հետ պարելու եմ հայկական ազգային պար: Իմ բոլոր հասակակիցներին էլ կմաղթեի հաջողություն քննություններում և նպատակասլացություն՝ իրականացնելու իրենց առջև դրված բոլոր երազանքները»,- ավելացրել է Ա. Տալկանչիևան:

Միջոցառմանը շրջանավարտները հանդես են եկել շնորհակալական ջերմ խոսքերով, հայրենասիրական և ազգագրական երգ ու պարով, տոնական վալսով:

Շրջանավարտներին շնորհավորել են նաև դպրոցի 2018-2019 ուս տարվա առաջին դասարանի սաները: