Ըստ ԱՀ կրթության, գիտության և սպորտի նախարարության հաստատած պլանի՝ մայիսի 26-ին Արցախի հանրակրթական բոլոր դպրոցներում հնչել է «Վերջին զանգ»-ը:
Արցախում «Վերջին զանգ»-ն այս տարի հնչել է 2672 շրջանավարտի համար. նախարար (տեսանյութ)
ՍՏԵՓԱՆԱԿԵՐՏ, մայիսի 26, ԱՐՑԱԽՊՐԵՍ: Այդ կապակցությամբ բոլոր դպրոցներում վաղ առավոտից մեկնարկել են հանդիսավոր միջոցառումներ:
«Արցախպրես»-ի թղթակցի հաղորդմամբ՝ «Վերջին զանգ»-ի առթիվ, ԱՀ կրթության, գիտության և սպորտի նախարար Նարինե Աղաբալյանն այցելել է Երևանի պետական համալսարանին առընթեր Արտաշես Շահինյանի անվան ֆիզիկամաթեմատիկական հատուկ դպրոցի Ստեփանակերտի մասնաճյուղ և մասնակցել տոնական միջոցառմանը:
Վերջին զանգին նվիրված միջոցառումը ֆիզիկամաթեմատիական հատուկ դպրոցում, մեկնարկել է Արցախի Հանրապետության դրոշի և պետական օրհներգի ներքո, որից հետո ելույթներով հանդես են եկել դպրոցի տնօրեն Սուսաննա Ներսեսյանը, շրջանավարտներ, ծնողներ: Շնորհավորելով Վերջին զանգի կապակցությամբ, տնօրենը նշել է, որ Ստեփանակերտի Երևանի պետական համալսարանին առընթեր Արտաշես Շահինյանի անվան ֆիզիկամաթեմատիկական հատուկ դպրոցն այս տարվա շրջանավարտները 29-րդն են դպրոցի պատմության մեջ: Այս անգամ կրթօջախին հրաժեշտ է տալիս 21 շրջանավարտ: Դպրոցի տնօրենն, իր խոսքում, բարձր է գնահատել ուսումնառության տարիների ընթացքում շրջանավարտների ունեցած ձեռքբերումներն ու հաջողությունները:
Միջոցառման ընթացքում, առարկայական օլիմպիադաներում և տարբեր մրցույթներում առաջնակարգ տեղեր գրաված աշակերտները Ստեփանակերտի քաղաղաքապետարանի աշխատակազմի կրթության և սպորտի բաժնի կողմից պարգևատրվել են պատվոգրերով ու շնորհակալագրերով:
Շնորհավորանքի իր խոսքով ԿԳՍ նախարարը դիմելով շրջանավարտներին մասնավորապես ասել է. «Դպրոցական վերջին զանգը կարևոր խորհուրդ ունի իր մեջ: Այս պահից սկսած ձեզնից յուրաքանչյուրն ազատ է՝ ինքնուրույն որոշում կայացնելու և ընտրություն կատարելու գործում: Հետևաբար, սա նաև շատ պատասխանատու պահ է: Այս հանգրվանին դուք հասել եք ձեր ծնողների և ուսուցիչների օգնությամբ: Այսօր կանգնած եք ճամփաբաժանին և ինքներդ պիտի որոշեք՝ որ ուղղությամբ գնալ: Դուք Արցախի Հանրապետության նոր սերունդն եք, և վաղը ձեզ է վստահվելու մեր երկրի ճակատագիրը, երկիր, որի ազատության և անկախության համար հազարավոր հայորդիներ իրենց կյանքն են զոհաբերել: Երկիր, որի կայացմանը ողջ հայ ազգն է աջակցել: Վստահ եմ՝ այսօր, ի դեմս ձեզ, մենք դեպի մեծ կյանք ենք ճանապարհում խելացի, շնորհալի, նախաձեռնող ու հայրենասեր սերունդ, որը հպարտանալու բազում պահեր է պարգևելու մեզ և մեծ պատասխանատվությամբ է ստանձնելու մեր հայրենիքի զորացման պատվաբեր առաքելությունը»:
Նախարարը նաև երախտագիտություն է հայտնել ու բարձր գնահատել բոլոր այն ուսուցիչներին, ովքեր սիրով ու նվիրումով են կատարում իրենց առաքելությունը:
Ն. Աղաբալյանը հավելել է, որ Արցախի դպրոցների շուրջ՝ 2672 շրջանավարտներից հիմնական դպրոցի 9-րդ դասարանն ավարտել է 1885 աշակերտ, իսկ ավագ դպրոցները՝ 787: