Այսօր՝ հունիսի 2-ին, մի խումբ երիտասարդներ Ստեփանակերտի կենտրոնական փողոցներից մեկում բողոքի ակցիա են սկսել՝ փակելով փողոցի երթևեկելի հատվածը:
Ստեփանակերտի կենտրոնական փողոցներից մեկում մի խումբ երիտասարդներ բողոքի ակցիա են սկսել
ՍՏԵՓԱՆԱԿԵՐՏ, հունիսի 2, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ բողոքի մասնակիցներին վրդովեցրել է հունիսի 1-ի լույս 2-ի գիշերը ԱՀ ազգային անվտանգության ծառայության (ԱԱԾ) մի խումբ զինծառայողների մասնակցությամբ կենցաղային հողի վրա տեղի ունեցած ծեծկռտուքը:
Ինչպես նշել է ակցիայի նախաձեռնող Դավիթ Սիմոնյանը, միջադեպն իսկապես անընդունելի է, և իշխանությունը պետք է անհապաղ քայլեր ձեռնարկի մեղավորներին պատժելու համար:
«Մենք պահանջում ենք ուժային կառույցների համապատասխան ղեկավարների հրաժարականը, քանի որ անընդունելի է համազգեստով ծառայողների մասնակցությամբ մայրաքաղաքի մեջ ծեծկռտուք կազմակերպելը: Բոլոր պատասխանատուները պետք է ազատվեն աշխատանքից և պատասխանատվության ենթարկվեն»,- ասել է Դ. Սիմոնյանը:
Ակցիայի մասնակիցների պահանջը լսելու նպատակով դեպքի վայր են ժամանել ԱՀ պետական նախարար Արայիկ Հարությունյանը, ԱՀ անվտանգության խորհրդի նախագահ Վիտալի Բալասանյանը, Ազատամարտիկների միության նախագահ Սամվել Կարապետյանը, ԱԺ պատգամավորներ Հայկ Խանումյանը և Լեռնիկ Հովհանիսյանը:
Ավելի ուշ բողոքի մասնակիցներին իր աջակցությունն է հայտնել նաև ԱԺ նախկին պատգամավոր Վահան Բադասյանը:
Իշխանության ներկայացուցիչները հավաստիացրել են, որ առաջադրված խնդիրները լուծվելու են օրենքի շրջանակում, և բոլոր մեղավորները պատասխանատվություն են կրելու: Սակայն նախաձեռնության հեղինակ Դավիթ Սիմոնյանը հայտարարել է, որ մինչև չկատարվի ցուցարարների պահանջը, իրենք շարունակելու են իրենց բողոքի ակցիան:
Հիշեցնենք, որ հունիսի 1-ին Արցախի ԱԱԾ հատուկ ջոկատայինները ծեծի էին ենթարկել երկու քաղաքացիների, որոնք հոսպիտալացվել են:
Հավելենք, որ միջադեպի վերաբերյալ հայտարարությամբ հանդես են եկել ԱՀ դատախազությունը, ԱՀ ոստիկանությունը և Մարդու իրավունքների պաշտպանի գրասենյակը:
«Արցախպրես»-ը հետևում է բողոքի ակցիային. ավելի ուշ կներկայացնենք նոր մանրամասներ:
