Կյանքից հեռացել է արձակագիր, լրագրող, նկարիչ Վանիկ Սանթրյանը

ՍՏԵՓԱՆԱԿԵՐՏ, մարտի 19, ԱՐՑԱԽՊՐԵՍ: «Արմենպրես»-ի հետ զրույցում նրա մահվան լուրը հայտնեց Հայաստանի գրողների միության նախագահ Էդվարդ Միլիտոնյանը։ «Ես տեղեկացել եմ իր ընտանիքի անդամներից։ Նրանք զանգահարեցին և հայտնեցին այդ գույժը։ Նա արդեն երկար ժամանակ է պառկած էր, արդեն տարիքով բավականին մեծ էր»,- նշեց Միլիտոնյանը։

Վանիկ Ալեքսանի Սանթրյանը ծնվել է 1935 թվականի հունվարի 16-ին, Թաղավարդ գյուղում (Արացխի Հանրապետություն, Մարտունու շրջան)։ Ավարտել է Երևանի պետական համալսարանի բանասիրական ֆակուլտետը։ 1957-1962 թվականներին որպես լրագրող աշխատել է «Երևան» թերթի խմբագրությունում, 1962-2010 թվականներին՝ «Արմենպրես» լրատվական գործակալությունում (Արամայիս Սարգսյանի հրավերով)։ Վերջին տարիներին աշխատել է «Հայաստանի Հանրապետություն» օրաթերթում: Ավելի քան 36 գրքի հեղինակ է։ Արձակագիրը իր կյանքի ընթացքում գրել է մի շարք երկրեր, որոնցից են՝ «Փառք ճանապարհին» (1969թ.), «Երգի ճամփաներին» (1973թ.), «Լեգենդը կոչվում է Կամո» (1982թ.), «Մաշտոցի որդիները» (1985թ.), «Ասք Գրիգոր Լուսավորչի և Տրդատ Մեծի» (1999թ.), «Վարք երեք սրբերի» (2002թ.), «Լեռների որդու դիմանկարը» (2005թ.) և այլն: Իր գործունեության ընթացքում ստացել է մի շարք պարգևներ՝ Հայաստանի ժուռնալիստների միության մրցանակ, 2010 ՀՀ մշակույթի նախարարոթւյան ոսկե մեդալ։ 2010 թվականին ստացել է նաև ՀՀ վաստակավոր լրագրողի կոչում և ՀՀ վարչապետի շնորհակալագիր 2011 թվականին։ 

Վանիկ Սանթրյանը «Արմենպրես» լրատվական գործակալության ամենաերկարամյա թղթակիցն է: Նա իր կյանքի 48 տարիներն անցկացրել է գործակալությունում: 2011թ. դեկտեմբերին «Արմենպրես»-ին տված հարցազրույցում Վանիկ Սանթրյանն ասել էր, որ իրեն «Երեկոյան Երեւան» օրաթերթից «Արմենպրես» է հրավիրել Արամայիս Սարգսյանը:

Տասներեք տնօրենների հետ աշխատած Սանթրյանի կարծիքով` «Արմենպրես»-ն իր բուռն ծաղկումն ապրել է տնօրեն Արտավազդ Խաչիկյանի օրոք, ով պաշտոնավարել է շուրջ 15 տարի:

«Խաչիկյանի օրոք «Արմենպրես»-ը հզոր, հուժկու գործակալություն էր` թաթը դրած ամբողջ մամուլի վրա: Թերթերը տպագրում էին միայն «Արմենպրես»-ի ինֆորմացիան»,- ասել էր նա՝ հավելելով. «Ափսոսում եմ, որ «Արմենպրես»-ում չեմ, որն ինձ համար եղել է օջախ, դպրոց եւ ուսուցիչ»։

«Արմենպրես»-ի ամբողջ անձնակազմը սգում է Վանիկ Սանթրյանի՝ ընկերոջ և ուսուցչի կորուստը՝ վշտակցություն հայտնելով նրա հարազատներին և ընկերներին։