Արցախյան շարժման 30-ամյակին նվիրված` միջոցառումներ կկազմակերպվեն արտերկրում. նախարար
10:08 20 փետրվարի, 2018ՍՏԵՓԱՆԱԿԵՐՏ, փետրվարի 20, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին փետրվարի 19-ին կայացած մամուլի ասուլիսի ժամանակ ասել է ԱՀ արտաքին գործերի նախարար Մասիս Մաիլյանը:
Մասնավորապես՝ փետրվարի 22-ին Մոսկվայում` «Ռեգնում» լրատվական գործակալությունում, տեղի է ունենալու կլոր սեղան՝ նվիրված Արցախյան շարժման 30-ամյակին:
Փետրվարի 24-ին Բեյրութում կայանալու է հորդանանցի հայ լուսանկարչի ցուցահանդեսի բացում, ով 1994 և 2016 թվականներին Արցախում տեղի ունեցած պատերազմական գործողությունների ժամանակ եկել է Ղարաբաղ և լուսանկարել պատերազմը արտացոլող պատկերներ: Նա ցուցահանդեսին ներկայացնելու է մոտ 60 լուսանկար:
Նախարարի խոսքով՝ «Արցախի օրերը Ֆրանսիայում» ծրագրի շրջանակներում կազմակերպվող միջոցառումների մի մասը ևս նվիրված է լինելու շարժման 30-ամյակին:
«Տարվա ընթացքում արտասահմանում քաղաքական, մշակութային տարբեր միջոցառումներ են նախատեսվում, որոնց մասնակցելու են մեր մշտական ներկայացուցչությունները: Այդ միջոցառումներին մասնակցելու համար Արցախից գործուղվելու են նաև տարբեր պաշտոնյաներ: Կլինեն դասախոսություններ, ելույթներ»,- ասել է Մ. Մաիլյանը՝ հավելելով, որ սա ևս մեկ հնարավորություն է՝ միջոցառումների շնորհիվ տեղեկացնելու լայն հասարակությանը շարժման պատմության, խնդրի էության մասին, ինչպես նաև՝ խոսելու մեր իրավունքներից: