Սիրիայում ու Իրաքում «Իսլամական պետության» դիրքերի զիջումով պայմանավորված՝ Աֆղանտան գրոհայինների հոսքը աճել է։
ՀԱՊԿ–ն միջոցներ է ձեռնարկում Աֆղանստանում ակտիվացած ԻՊ դեմ․ ՀԱՊԿ շտաբի պետ
ՍՏԵՓԱՆԱԿԵՐՏ, 7 փետրվարի, ԱՐՑԱԽՊՐԵՍ: ՀԱՊԿ շտաբի պետ գեներալ-գնդապետ Անատոլի Սիդորովի խոսքով՝ Աֆղանստանի հյուսիսը ՀԱՊԿ-ի ուշադրության կենտրոնում է, քանի որ այն սահմանակից է ՀԱՊԿ անդամ Տաջիկստանին, գրում է Razm.info լրատվական կայքը:
«ՀԱՊԿ–ն հաշվի է առնում ԻՊ խմբավորումների ակտիվացումը Աֆղանստանի տարածքում և միջոցներ է ձեռնարկում դրա դեմ։․․․Կենտրոնական Ասիայում Աֆղանստանը թույլ կետ է, որտեղ գրոհայինները անընդհատ հաստատվելու փորձեր են անում։ Ընդ որում՝ թիրախային են Աֆղանստանի հյուսիսային տարածքները, որոնք հարևան Տաջիկստանին սահմանակից են»,– «ՌԻԱ Նովոստիի» փոխանցմամբ նշել է Սիդորովը։
ՀԱՊԿ-ը հետխորհրդային տարածքի վրա ստեղծված ռազմաքաղաքական միջազգային կազմակերպություն է, որի անդամները են Հայաստանը, Ռուսաստանը, Բելառուսը, Ղազախստանը, Ղրղզստանն ու Տաջիկստանը: Կառույցի նպատակն անդամ երկրների անվտանգությունը հավաքական միջոցներով ապահովելն է: Մասնակից երկրներից յուրաքանչյուրի վրա հարձակումը համարվում է հարձակում կազմակերպության անդամ բոլոր երկրների վրա:
Աֆղանստանի հյուսիսում ԻՊ ակտիվության բարձրացում ՀԱՊԿ–ը կանխատեսում էր 2018 թվականի գարնանը։ Տաջիկստանում ՀԱՊԿ–ը և առանձին ռուսաստանյան ռազմաբազան պարբերաբար անցկացնում են զորավարժություններ (1,2,3․․․): 2018 թվականի աշնանը Տաջիկստանում ձերբակալվել էր 12 զինյալ, որոնք ԻՊ պատվերով պատրաստվում էին ահաբեկչություն անել Տաջիկստանի ռուսական ռազմաբազայում և Դուշանբեի ՌԴ ՊՆ դպրոցում։
Ընդհանուր առմամբ 2018 թվականից, բաց աղբյուրներից ստացված տեղեկություններով, Աֆղանստանում ԻՊ և «Թալիբան» ծայրահեղական շարժման գործողություններից զոհվել է շուրջ 900 մարդ, հայտնում է «ՌԻԱ Նովոստին»։
