Անցած տարում ոլորտում իրականացվել են պետական նպատակային ծրագրեր. ԱՀ ՄԵՀԶ նախարարը հանդես է եկել ամփոփիչ մամուլի ասուլիսով
2018 թվականին ԱՀ պետական բյուջեով նախատեսված միջոցներով շարունակվել է պետական նպատակային ծրագրերի և միջոցառումների իրականացումը։ Մշակույթի ոլորտում աշխատանքներ են տարվել ազգային մշակույթի պահպանման, հանրապետությունում մշակութային կյանքի աշխուժացման, գեղարվեստական կրթության զարգացման, ՀՀ և արտերկրի հետ կապերի զարգացման ու ամրապնդման, ոչ նյութական մշակութային ժառանգության պահպանման ու հանրահռչակման, մշակույթի ոլորտի կադրերի վերապատրաստման ու վերաորակավորման ուղղություններով:
Անցած տարում ոլորտում իրականացվել են պետական նպատակային ծրագրեր. ԱՀ ՄԵՀԶ նախարարը հանդես է եկել ամփոփիչ մամուլի ասուլիսով
ՍՏԵՓԱՆԱԿԵՐՏ, 12 փետրվարի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին այսօր՝ փետրվարի 12-ին կայացած ամփոփիչ մամուլի ասուլիսի ժամանակ ասել է ԱՀ մշակույթի, երիտասարդության հարցերի և զբոսաշրջության նախարար Լեռնիկ Հովհաննիսյանը՝ ավելացնելով, որ հաշվետու ժամանակաշրջանում ապահովվել է Արցախի թատերահամերգային կոլեկտիվների ու անհատ կատարողների մասնակցությունը ՀՀ-ում և արտերկրում անցկացված մրցույթներին ու փառատոններին։
«Բացի դրանից, ստորագրվել է համագործակցության մասին եռակողմ համաձայնագիր նախարարության, «ԻԿՕՄ-ի հայկական թանգարանների ազգային կոմիտե»-ի և «Թանգարանների աշխատողների ու բարեկամների ասոցիացիա» հասարակական կազմակերպությունների միջև։ Կազմակերպվել են միջոցառումներ «ԻԿՕՄ-ի հայկական թանգարանների ազգային կոմիտե»-ի, Հայաստանի ազգային արխիվի, ՀՅԴ Արցախի երիտասարդական միության, «Ժամանակակից արվեստի ինստիտուտ» հիմնադրամի հետ»,- նշել է Լ. Հովհաննիսյանը:
ԱՀ ՄԵՀԶ նախարարն անդրադարձել է նաև տարվա ընթացքում իրականացված մի շարք այլ ծրագրերի: Մասնավորապես՝ մեթոդական աջակցություն է ցուցաբերվել նախարարության ենթակայութամբ գործող ՊՈԱԿ-ներին մշակութային միջոցառումների կազմակերպման, տոների ու հիշատակի օրերին նվիրված միջոցառումների, ֆիլմերի ցուցադրությունների, սեմինարների ու վերապատրաստման դասընթացների անցկացման հարցում։ Շարունակվել են բրուտագործության զարգացմանն ուղղված միջոցառումները, Շուշիի «Նարեկացի» արվեստի միության հետ համատեղ Շուշիում կազմակերպվել է «BrutArt» կավագործության միջազգային սիմպոզիումը։ Հրատարակվել են Դավիթ Միքայելյանի «Սիրուց և ցավից ծնված երգեր» երգարանը, Ջամալ Թադևոսյանի «Հովհաննես Շիրազը և Ղարաբաղը» հուշագրությունը, Նարինե Հովհաննիսյանի «Հայրենիքի գաղափարաբանությունը և ցեղասպանությունը խորհրդահայ գրականության մեջ» և Սլավա Սարգսյանի «Արցախի բնակավայրերը» գրքերը:
ԱՀ շրջաններում մշակույթի զարգացման ծրագրերի շրջանակներում անց է կացվել ԼՂՀ համայնքների միջև «Մշակութային խաչմերուկ» հանրապետական հինգերորդ մրցույթ-փառատոնը։
Աջակցություն է ցուցաբերվել «Ժամանակակից արվեստի ինստիտուտ» հիմնադրամին` հոկտեմբերի 5-7-ը Ստեփանակերտի Վ. Փափազյանի անվան պետական դրամատիկական թատրոնի շենքում և հարակից տարածքում Արցախի, Հայաստանի ու արտերկրի շուրջ 30 արվեստագետների մասնակցությամբ ARTsakh Fest ժամանակակից արվեստի փառատոնի կազմակերպման ուղղությամբ։
«Շրջաններում մշակութային կյանքի աշխուժացման նպատակով տարվա ընթացքում կազմակերպվել են համույթների հյուրախաղեր շրջկենտրոններում և համայքներում։ Ապահովվել է Արցախի երիտասարդների մասնակցությունը ՀՀ-ում և արտերկրում կազմակերպված երիտասարդական հավաքներին, համաժողովներին, դասընթացներին, ինտելեկտուալ խաղերին»,- ավելացրել է Լ. Հովհաննիսյանը։
Նախարարի խոսքով՝ կրոնի և ազգային փոքրամասնությունների ոլորտում տարվա ընթացքում կազմակերպվել են հանդիպումներ ԱՀ շրջանների հոգևոր պատասխանատուների հետ, կրոնական կազմակերպությունների ներկայացուցիչների հետ, դասախոսություններ «Հոգևոր անվտանգություն» թեմայով։ Տրվել է փորձագիտական եզրակացություն մեծ թվով կրոնական գրականության։
Մամուլի ասուլիսին Լ. Հովհաննիսյանը պատասխանել է նաև լրագրողների կողմից հնչեցված մի շարք հարցերի: