«Սասնա Ծռերի» տղաներն էլ ինչ-որ չափ պետք է շնորհակալ լինեն գեներալ Բալասանյանին. լրագրող
Արցախի ազատամարտիկների միության անդամ, լրագրող Ռուդոլֆ Մարտիրոսյանը կարծում է, որ բոլոր նրանք, ովքեր փորձում են «Արցախի հերոս», գեներալ Վիտալի Բալասանյանի հեղինակությունը վանկարկել, կապված «Սասնա Ծռերի» կողմից ոստիկանության պահպանության գունդը զավթելու հետ, անընդունելի է:
«Սասնա Ծռերի» տղաներն էլ ինչ-որ չափ պետք է շնորհակալ լինեն գեներալ Բալասանյանին. լրագրող
ՍՏԵՓԱՆԱԿԵՐՏ, 15փետրվարի,ԱՐՑԱԽՊՐԵՍ: «Նրանց կխնդրեի մատնանշել համաշխարհային փորձի նմանատիպ մի դեպք, որի ժամանակ բանակցությունները իշխանությունների և ահաբեկիչների, կամ թե ապստամբների միջև ընթացել են հարթ, ճիշտ առ ճիշտ բոլոր պայմանավորվածություններին խստիվ համապատասխան»,- նշել է մեր զրուցակիցը:
Ռ. Մարտիրոսյանի խոսքով՝ գեներալ Վ Բալասանյանը տվյալ դեպքում միջնորդ էր, և նրա գերագույն նպատակն էր կանխել հետագա հնարավոր արյունահեղությունը այնպիսի պարագայում, երբ զինված խումբը պատրաստ էր մինչև վերջ դիմադրել, իսկ իշխանությունները չէին ների կատարված հանցագործությունը՝ արդեն առկա զոհերով, պատանդ վերցրված ոստիկանության աշխատակիցներով:
«Այնպես, որ թեկուզ մեկ մարդու կյանքի փրկության նպատակը արդարացնում է ցանկացած միջոց: Փոխանակ շնորհակալություն հայտնեն այդ օրերին գուցե միակ, եզակի վստահություն ներշնչող, ռիսկի դիմած գեներալին, փնովում են: Կարծում եմ՝ «Սասնա Ծռերի» տղաներն էլ ինչ-որ չափ պետք է շնորհակալ լինեն այդպիսի ավարտի դիմաց: Մնում է ընդիմախոսներն էլ իրենց հերթին ընկալեն, որ ի վերջո խիղճն ու բանականությունը ևս բարոյական կատեգորիաներ են»,- ասել է ռազմական լրագրության ոլորտում մեծ փորձ ունեցող լրագրողը: