Իրանում զինծառայողների մեքենայի պայթեցման համար Իրանի Իսլամական հեղափոխության պահապանների կորպուսի հրամանատար Մոհամմադ Ալի Ջաֆարին մեղադրել է Պակիստանի իշխանություններին։
27 մարդու կյանք խլած ահաբեկչության համար Իրանում մեղադրում են Պակիստանի իշխանություններին
ՍՏԵՓԱՆԱԿԵՐՏ, 16 փետրվարի, ԱՐՑԱԽՊՐԵՍ: Իրանի բանակին զուգահեռ գործող այս զինված կառույցը անմիջականորեն ենթարկվում է հոգևոր առաջնորդին, ինչից կարելի է ենթադրել, որ այս մեղադրանքը նաև համաձայնեցված է բարձրագույն իշխանության հետ, գրում է SHANTNEWS.am լրատվական կայքը:
27 զինծառայողի մահվան պատճառ դարձած հարձակման կազմակերպիչներին, ըստ գեներալի, աջակցում են Պակիստանի անվտանգության ծառայությունները․ նրանք, ըստ իրանցի հրամանատարի, գիտեն ահաբեկիչների թաքնվելու տեղերը, սակայն չեն հայտնում այդ մասին։ Ըստ այդմ, ըստ Ջաֆարիի, այդ երկրի իշխանությունները պետք է պատասխանատվություն կրեն նաև հարձակման համար։
Բանն այն է, որ ահաբեկչական հարձակումը եղել է Իրանի այն նահանգում, որը սահմանակից է Պակիստանին։ Այդ հատվածում երկու պետությունների սահմանները հստակ նշված չեն, քանի որ անապատային տարածքով են անցնում։ Սա թույլ է տալիս երկու կողմերից գործող անջատողական խմբավորումներին հաճախակի հատել սահմանն ու թաքնվել իրավապահ մարմիններից։
Ահաբեկչական հարձակումը, հիշեցնենք, եղել է փետրվարի 13-ին։ Մահապարտ ահաբեկիչն ականապատ մեքենայով բախվել է Իրանի Իսլամական հեղափոխության պահապանների կորպուսի զինծառայողներին տեղափոխող ավտոբուսին: Պայթյունի հետևանքով 27 զինծառայող մահացել է, ևս 14 զինծառայող ստացել է վնասվածքներ։ Ահաբեկչության պատասխանատվությունը ստանձնել է «Ջաիշ ալ-Ադլ» անջատողական խմբավորումը:
