Հադրութի շրջվարչակազմի աշխատակազմի մշակույթի և երիտասարդության հարցերի բաժնի նախաձեռնությամբ հունիսի 10-17-ը շրջկենտրոնում երրորդ անգամ կազմակերպվելու է «Դիզակի գույները» նկարչական միջազգային սիմպոզիում:
Հադրութում կազմակերպվելու է «Դիզակի գույները» նկարչական միջազգային երրորդ սիմպոզիում
ՍՏԵՓԱՆԱԿԵՐՏ, 18 փետրվարի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է Հադրութի շրջվարչակազմի աշխատակազմի մշակույթի և երիտասարդության հարցերի բաժնի վարիչ Երազիկ Հայրիյանը:
Նա տեղեկացրել է, որ սիմպոզիումին մասնակցել ցանկացողները պետք է ներկայացնեն 10-15 բարձր որակի նկարչական աշխատանքներ, իրենց ինքնակենսագրականը և լուսանկարը:
«Պրոֆեսիոնալ հանձնաժողովը ներկայացված հայտերից կընտրի 15 արվեստագետի։ Աշխատանքները կյանքի կոչելու համար կտրամադրվեն համապատասխան նյութեր՝ կտավ, ներկեր (վրձինները բերում է մասնակիցը): Յուրաքանչյուր մասնակից Հադրութի մշակույթի և երիտասարդության հարցերի բաժնին պետք է նվիրի 4 աշխատանք, որոնք պիտի ստեղծվեն սիմպոզիումի ընթացքում: Երևանից Հադրութ տրանսպորտի, կեցության և սննդի ծախսերը կհոգան կազմակերպիչները»,-ավելացրել է մեր զրուցակիցը։
Խոսելով նախորդ երկու սիմպոզիումների նշանակության մասին՝ Ե. Հայրիյանն ասել է, որ այդ կերպ օտարերկրյա արվեստագետները կարողանում են շփվել արցախցիների հետ, ծանոթանալ Արցախի պատմությանը, այցելել Արցախ աշխարհի պատմական վայրեր, վայելել գեղատեսիլ բնությունը. դրանք նկարիչների կտավներում իրենց արտացոլանքն են գտնում:
«Կազմակերպելով նման միջոցառում` երկու կարևոր խնդիր է լուծվում. առաջին` նկարիչներին ծանոթացնել հարազատ բնաշխարհի այս հատվածին, ոգևորել, ի հայտ բերել նրանց ստեղծագործական ներուժը, և երկրորդ` աշխուժացնել տեղի մշակութային կյանքը` սիմպոզիումի շրջանակներում անցկացնելով զանազան միջոցառումներ»,- ասել է պատասխանատուն:
Նշենք, որ ցանկացողները մանրամասների համար կարող են զանգահարել՝ (+374) 47 55-12 -51 կամ (+374) 97 30-39-37 հեռախոսահամարներին: Հայտերն ընդունվում են ապրիլի 5- 25-ը:
