ՍՏԵՓԱՆԱԿԵՐՏ, 19 փետրվարի, ԱՐՑԱԽՊՐԵՍ:«Արցախպրես»-ի   թղթկացի  հաղորդմամբ՝  միջոցառմանը   բացման   խոսքով  հանդես  է  եկել  ԱՀ  գրողների  միության  նախագահ   Վարդան    Հակոբյանը: Նա  նշել է, որ   Թումանյանն աստվածային  երևույթ  է  հայ ժողովրդի  կյանքում: 

«Մեծանուն  լոռեցին   բոլոր  ժամանակներում  սիրվել  է  ու շարունակելու է  սիրվել  ողջ  հայության  կողմից. նա  ապրում  է  բոլորի հոգիներում,  և  այսօր  էլ արդիական  են  նրա  ստեղծագործությունները:

Թումանյանի   հիմնական  առանցքը  մարդն  է:  Հովհաննես  Թումանյանն  իր   ստեղծագործություններում   ոչ  թե  ներկայացրել է   նահապետական  աշխարհը, այլ   այնտեղ  ապրող  գեղջուկ  հայի       երազն  ու  տեսլականը»,-մասնավորապես  ասել է Վ.  Հակոբյանը:

Միջոցառմանը   Արցախի  թեմի  առաջնորդ  Պարգև  Արքեպիսկոպոս    Մարտիրոսյանը  հանդես  է  եկել   օրհնության  խոսքով՝    ասելով. «Այս  Սուրբ  վայրում՝ Գանձասարի  Մատենադարանում,   մենք  այսօր  նշում  ենք    ազգագրագետ, մեծ  մտավորական, ազգային  գործիչ, վերնատան  հիմնադիր, բազմակողմանի  օժտված մարդու  և հայրենասերի   ծննդյան  150-ամյակը: Կազմակերպելով    այսպիսի գիտաժողովներ՝  մենք  ոչ  միայն  զենքով   են   դիմագրավում  թշնամուն, այլև՝ գրչով, բառ  ու  բանով»:

 

ԱՀ   կրթության, գիտության   և  սպորտի  նախարար  Նարինե  Աղաբալյանն  իր  ելույթում   ըստ  էության   ասել է, որ    տարին  հոբելյանական  և   խորհրդավոր  է. «Հայ  երկու    հանճարները՝    բանաստեղծ  Հովհաննես  Թումանյանը  և   երգահան  Կոմիտասը  ծնվել  են    նույն  տարում: Նրանք  բոլոր  դարերում  էլ  փարոսի  նման   լուսավորելու  են հայ  ժողովրդի  երթը  դեպի  հավերժություն:   Այսօր՝  150  տարի անց՝ մեզ  համար  բախտորոշ    այս  ժամանակահատվածում,  մեր  մեծերը  պատգամում  են, որ    չմոլորվենք և փորձենք նայել   ու  գնահատել  ինքներս մեզ նրանց   աչքերով»:

ԱՀ  մշակույթի, երիտասարդության   հարցերի  և  զբոսաշրջության  նախարար  Լեռնիկ  Հովհաննիսյանն  էլ իր  խոսքում  ասել է, որ  հայ  ժողովուրդը    պարտավոր  է  միշտ   հիշել,    գնահատել  ու  հավերժացնել իր Մեծերին:

«Պատահական  չէ, որ  նրանց  ծնունդները  մեզ  համար  յուրօրինակ  տոն  են: Մենք  շարունակում  ենք    

կրթվել ու  դաստիարակվել    թե´  նրանց ստեղծագործություններով,թե´  նրանց  կերպարներով»,-ընդգծել  է Լ. Հովհաննիսյանը:

Գրիգոր  Ներկացի  համալսարանի  «Արեւմտահայերէնի, հայագիտութեան գիտահետազօտական Լուտովիկա և Յակոբ Այնթապլեան կենտրոն»-ի  տնօրեն  Ամալյա  Գրիգորյանը, խոսելով  գրողի  մասին,   ասել է, որ   Թումանյան  մտածողի, գեղագետի  մտահոգությունների  շրջանակը  բավականին  լայն  է  և  ընդգրկուն:

Նա  իր   ելույթում  մասնավորապես  ասել է. «Սկսած  19-րդ  դարի  90-ական  թվականներից՝  Թումանյան-գեղագետը  հանդես  է  գալիս նաև  իր  գրական-քննադատական  հրապարակումներով, որոնց  մեջ  ներկայացնում  է  իր  ըմբռնումները, շարադրում գրականության  նկատմամբ իր  մոտեցումները, ցույց  տալիս  խոսքի  զարգացման   ճշմարիտ  ուղիները: Այսօր, արդեն  տարիների  հեռվից,  դրանց  ուսումնասիրությունն  ու  վերլուծությունը  հնարավորություն  են ընձեռում  ընդհանուր  գաղափար կազմել գեղագետի   ամբողջական կերպարի  բազմակողմանի  ընկալման  ու բացահայտման մասին,  նորովի  մեկնաբանել  գրողի գրական  և  քննադատական   գործունեությունը»:

 Գրիգոր Նարեկացի    համալսարանի  գրականության  ամբիոնի  դասախոս  Տաթևիկ  Պողոսյանը՝  հանդես  գալով   «Իսահակյան- Թումանյան գրական բարեկամության  մի քանի  դրվագներ»  ելույթով՝   մասնավորապես   ներկայացրել է հայ  գրականության  երկու   մեծերի  նամակներում   արտահայտված  բարեկամական կապը, որից  ընթերցողն  ամբողջական  պատկերացում  է  կազմում  Թումանյան  և  Իսահակյան  մարդ-  քաղաքացիների  մասին: 

 

Միջոցառմանը  ելույթներով  հանդես  են  եկել  նաև  ԱՀ  գրողների  միության   անդամներ, Գրիգոր  Նարեկացի  համալսարանի  դասախոսներ:

Գիտաժողովին  ներկա  էին ԱՀ  նախագահ  Բակո  Սահակյանը, պետական  այրեր, հյուրեր  և  այլք: