Ասկերանի Գուրգեն Գաբրիելյանի անվան կենտրոնական գրադարանը նվիրատվության կարգով ԱՀ մշակույթի, երիտասարդության հարցերի և զբոսաշրջության նախարարության կողմից շուրջ 100 կտոր գիրք է ստացել:
ԱՀ մշակույթի, երիտասարդության հարցերի և զբոսաշրջության նախարարությունն Ասկերանի գրադարանին է նվիրաբերել 100 կտոր գիրք
ՍՏԵՓԱՆԱԿԵՐՏ, 20 փետրվարի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է Ասկերանի կենտրոնական գրադարանի տնօրեն Նունե Կարապետյանը՝ նշելով, որ այդ գրքերը կապոցներով նվիրել են շրջանի դպրոցներին, գրադարաններին և այլ հաստատությունների:
Խոսելով գրադարանի մասին՝ տնօրենը նշել է, որ իրենք 2009 թվականից աշխատում են Ասկերանի քաղաքապետարանի շենքի առաջին հարկում:
«Գրադարանն ունի ընթերցասրահ, սպասարկման բաժին: Գրքային ֆոնդը 10 հազար 69 կտոր է: Տարվա կտրվածքով ունենում ենք 524 ընթերցող. այդ թիվն տարեցտարի ավելանում է: Գրադարանում կազմակերպվում են տարբեր միջոցառումներ: Այս տարի նախատեսում ենք կազմակերպել Հովհաննես Թումանյանի, Կոմիտասի ծննդյան 150-ամյակներին նվիրված միջոցառումներ»,-նշել է Ն. Կարապետյանը:
Անդրադառնալով գրադարանի խնդիրներին՝ տնօրենն ասել է, որ շենքային պայմանները տիպային չեն. տարածքը փոքր է, գրապահարանները՝ քիչ, այդ պատճառով էլ հաճախ մասնագիտական և գեղարվեստական գրքերի պակաս են ունենում:
