Հայտնի Facebook սոցցանցի ղեկավարությունն արգելափակել է ադրբեջանական ծագմամբ թուրք լրագրող և բլոգեր Ֆուադ Աբբասովի տեղադրած՝ վերջերս Մոսկվայում ադրբեջանցիների ու չեչենների միջև ծագած կոնֆլիկտում «հայկական հետքի» մասին տեսանյութը:
Facebook-ն արգելափակել է լրագրող Ֆուադ Աբբասովի՝ ադրբեջանցիների ու չեչենների միջև ծագած կոնֆլիկտում «հայկական հետքի» մասին պատմող տեսանյութը
ՍՏԵՓԱՆԱԿԵՐՏ, 20 փետրվարի, ԱՐՑԱԽՊՐԵՍ: Տեսանյութի արգելափակման մասին բլոգերն ինքն է հայտնել ֆեյսբուքյան իր էջում՝ հավելելով, որ այն առկա է YouTube-ի իր տեսաալիքում, հայտնում է Tert.am-ը:
Տեսանյութում Աբբասովը փորձում է Մոսկվայում ծագած կոնֆլիկտը «հայերի կողմից սադրանքի» լույսի ներքո ներկայացնել` ցույց տալով, թե իբր կոնֆլիկտի մեղավորը հայ է եղել:
Հիշեցնենք, որ ՌԴ մայրաքաղաք Մոսկվայում ադրբեջանական ու չեչենական համայնքների ներկայացուցիչների միջև կոնֆլիկտը ծագել էր այն բանից հետո, երբ համացանցում հայտնվել էր տեսանյութ, որում ադրբեջանցիների կողմից ծեծի ենթարկված Ալիխան անունով չեչենը ներողություն է խնդրում ադրբեջանցիների հասցեին վիրավորանքներ հնչեցնելու համար:
Դրան հետևել էր Մոսկվայում ադրբեջանցի գործարարի պատկանող «Նեոլիտ» սրճարանի վրա չեչենների հարձակումն ու ադրբեջանցիների հետ զանգվածային ծեծկռտուքը:
Ավելի ուշ հաղորդվել էր, որ այդ հարցով երկու համայնքների ներկայացուցիչների միջև հանդիպում է կայացել, և «կոնֆլիկտը հարթվել է»:
