Ստեփանակերտի Մեսրոպ Մաշտոցի անվան N4 հիմնական դպրոցում այսօր կազմակերպվել է «Աստվածատուր, աստվածալույս իմ մայրենի» խորագրով համաքաղաքային միջոցառում՝ նվիրված մայրենիի միջազգային օրվան:
Մայրենիի միջազգային օրվան նվիրված՝ Ստեփանակերտում կազմակերպվել է համաքաղաքային միջոցառում
ՍՏԵՓԱՆԱԿԵՐՏ, 20 փետրվարի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ միջոցառմանը դպրոցի աշակերտներն արտասանել են մայրենիին նվիրված բանաստեղծություններ, հանդես եկել հայրենասիրական երգերով ու պարերով:
ԱՀ կրթության, գիտության և սպորտի նախարար Նարինե Աղաբալյանն ասել է, որ շատ կարևոր է իմանալ մայրենիի միջազգային տոնի պատմությունը, որպեսզի հասկանալի լինի օրվա խորհուրդը. այս պատմության հիմքում բենգալացիների պայքարն է իրենց լեզվի և ինքնության պահպանման համար, և պայքարի արդյունքում այդ ժողովուրդը անկախություն ձեռք բերեց, կազմավորելով Բանգլադեշ պետությունը:
«1988 թվականին մեր պայքարը նույնպես սկսվեց ինքնության և լեզվի պահպանման պահանջով: Զուգադիպությամբ, արցախահայության համար ամենակարևոր որոշումն ընդունվեց մայրենիի օրվա նախօրեին՝ փետրվարի 20-ին և այդ օրը սահմանվեց որպես մեր ազգային Վերածննդի օր. այստեղ մեծ խորհուրդ կա: Շատ կարևոր է, որ այսօրվա սերունդը, որը ծնվել և մեծանում է ազատ և անկախ Արցախում, գիտակցի, որ լեզուն է մեր ինքնության հիմքը, և, որ առանց ինքնության ազգերը կործանվում են: Մեր օրերում համացանցն անկառավարելի է դարձրել լեզվի մաքրության պահպանումը: Եվ այս առումով շատ անելիք ունեն մեր ուսուցիչները, ովքեր պետք է աշակերտների գիտակցության մեջ սերմանեն, որ լեզվի կորստով մենք կորցնելու ենք մեր ինքնությունը: Լեզուն մեր միտքն է, մտածողությունը և այն անաղարտ պահելու համար պետք է մաքուր պահենք մեր միտքը»,-ասել է Ն. Աղաբալյանը:
ԱՀ կրթության, գիտության և սպորտի նախարարության լեզվի տեսչության պետ Արտակ Ղուլյանը, խոսելով մայրենիի անաղարտության մասին, ասել է, որ աշխարհի տարբեր երկրներում այսօր նշվում է մայրենի լեզվի օրը:«Մայրենիի օրն առիթ է մեկ անգամ ևս հետադարձ հայացք ձգելու անցյալին, խորհելու, քննելու, վերաարժևորելու անելիքները: Գաղտնիք չէ, որ երբեմն շատերը անտարբեր են եղել հայոց լեզվի անաղարտ պահելու գործում, հայոց լեզուն անհարկի համեմել են օտար լեզվի բառերով, աղավաղել այն: Ուրախ եմ, որ դպրոցներում և կրթական այլ հաստատություններում մեծ ուշադրություն է դարձվում մեր մայրենիին՝ հայոց լեզվին»-մասնավորապես ասել է Ա. Ղուլյանը՝ նշելով, որ այս օրերին հանրապետության բոլոր կրթօջախներում կազմակերպվում են մայրենիի օրվան նվիրված միջոցառումներ, որոնք տարբերվում են իրենց ինքնատիպությամբ:
ԱՀ ԿԳՍ նախարարության կողմից մայրենիի միջազգային օրվա առթիվ անցկացված հանրապետական մրցույթում առաջին, երկրորդ և երրորդ մրցանակային տեղեր գրաված դպրոցների՝ Մարտունու N1, Ստեփանակերտի N 4 և Նոր Մարաղայի միջնակարգ դպրոցի ներկայացուցիչները պարգևատրվել են դիպլոմներով և նվերներով, իսկ մատաղ սերնդի հայեցի դաստիարակության գործում ունեցած մեծ ավանդի համար մի խումբ ուսուցիչներ էլ պարգևատրվել են շնորհակալագրերով: Ի դեպ, մրցանակային տեղեր գրաված դպրոցների աշակերտները միջոցառումներով կհյուրընկալվեն իրար:
Միջոցառման վերջում դպրոցի տնօրեն Նելլի Թամրազյանը մայրենիի տոնի առթիվ ևս շնորհավորել է բոլորին՝ ընդգծելով, որ յուրաքանչյուր ոք պետք է անաղարտ պահի իր մայրենին: Վերջում նա շնորհակալություն է հայտնել միջոցառման կազմակերպիչներին, աշակերտներին ու աջակիցներին:
