ԱՀ մշակույթի, երիտասարդության հարցերի և զբոսաշրջության նախարարության նախաձեռնությամբ Ստեփանակերտի մշակույթի և երիտասարդության պալատում այսօր կայացել է Արցախի «Մենք ենք մեր սարերը» ազգագրական երգի-պարի պետական համույթի համերգը՝ մասնակցությամբ մանկապատանեկան ստեղծագործական կենտրոնի պարարվեստի ավագ խմբի սաների. այն նվիրված էր արցախյան ազգային-ազատագրական շարժման 31-ամյակին:
«Մենք ենք մեր սարերը» երգի-պարի պետական համույթը հանդես է եկել նոր երգերով (լուսանկարներ)
ՍՏԵՓԱՆԱԿԵՐՏ, 21 փետրվարի, ԱՐՑԱԽՊՐԵՍ: Համերագային ծրագրում ընդգրկված է եղել ազգագրական, հայրենասիրական, ժողովրդական երգեր և պարեր:
«Արցախպրես»-ի թղթակցի հետ զրույցում «Մենք ենք մեր սարերը» ազգագրական երգի-պարի պետական համույթի գեղարվեստական ղեկավար, արվեստի վաստակավոր գործիչ Գարի Ավանեսյանն ասել է, որ համույթն իր գործունեության 19 տարիների ընթացքում պատվով և պատասխանատվությամբ է կրել հայ ազգային երգն ու պարը:«Արտասահմանյան բեմերում միշտ բարձր ենք պահել հայ երգի ու պարի գոհարները, որ ժառանգել ենք ավագներից և այն փոխանցելու ենք նոր սերունդներին: Մենք համերգներով փորձում ենք նոր ոգի ու շունչ տալ մեր հայրենակիցներին: Հայրենասիրական մեր երգերն էլ են նպաստելու հանուն մեր ազատ ու անկախ Արցախի կայացման ու զարգացման գործին: Համույթի երգացանկի մեծ մասը հայրենասիրական և ազգագրական նոր երգերն են, որոնց մի մասի պրեմիերան համերգային երեկոյի ընթացում ներկայացրել ենք հանդիսատեսի դատին»,-ավելացրել է Գ. Ավանեսյանը:
Նա հավելել է նաև, որ 2018 թվականին համույթը համերգային հյուրախաղեր է ունեցել Ռուսաստանի Դաշնությունում, Ջավախքում, Հայաստանում և Արցախում:
Խոսելով 2019 թվականի ծրագրերի մասին՝ Գ. Ավանեսյանն ասել է, որ իրենք նախապատրաստվում են արտասահմանյան հյուրախաղերի:
Միջոցառմանը ներկա էին ԱՀ մշակույթի, երիտասարդության հարցերի և զբոսաշրջության նախարար Լեռնիկ Հովհաննիսյանը, մշակութասեր հասարակություն և այլք:
