Ռուսաստանի հայերի միության Մոսկվայի մասնաճյուղի նախագահ Շահեն Պետրոսյանն Արցախում է առաջիկայում իրենց կողմից իրականացվելիք ծրագրերը նախանշելու համար:
Կփորձենք ստեղծել ծրագիր, որտեղ կներգրավվեն ոչ միայն խոշոր, այլ նաև միջին բիզնեսի ներկայացուցիչները. մոսկվահայ գործարար
ՍՏԵՓԱՆԱԿԵՐՏ, 26 փետրվարի, ԱՐՑԱԽՊՐԵՍ: «Արցախպրես»-ի թղթակցի հետ զրույցում Շահեն Պետրոսյանն ասել է, որ այցի ընթացքում հանդիպել է Հանրապետության նախագահ Բակո Սահակյանի հետ և նրա հետ քննարկել, թե ինչով կարող են օգնել Արցախին, ինչպես կարող են ՌԴ հայ համայնքի ներկայացուցիչներին ծրագրեր առաջարկել, քանի որ համայնքի հայության կողմից պարբերաբար լինում են բազմաթիվ առաջարկներ:
«Ռուսաստանում բնակվող հայերը պատրաստակամ են ծրագրեր իրականացնելու, սակայն ոչ ոք չի պատկերացնում իրականացման մեխանիզմը, չի պատկերացնում, թե որ ոլորտներում այսօր օգնության կարիք ունի Արցախը: Արցախում գործող ընկերությունների հետ շփումներ, իհարկե, կան, սակայն պետք է մշակել ծրագիր, թե որտեղ կարելի է ներգրավել ոչ միայն խոշոր, այլ նաև միջին բիզնեսի ներկայացուցիչներին, ովքեր պատրաստ են փոքր ձեռնարկություն հիմնել կամ փոքր ծրագրի մասնակից լինել: Ուրախ եմ, որ Նախագահ Սահակյանի կողմից շատ օգտակար առաջարկներ եղան»,- մանրամասնել է Շ. Պետրոսյանը:
Նրա խոսքով՝ այդ կերպ իրենք կկարողանան ստեղծել մի կամուրջ, որի արդյունքում բազմաթիվ հայեր հետաքրքրված կլինեն Արցախ այցելելով իրենց բիզնեսը զարգացնելով և հանդես կգան ավելի համախմբված:
Ռուսաստանաբնակ գործարարը կարծում է, որ պետք է ստեղծել գործնական դաշտ, քանի որ այն իրենից ներկայացնում է լայնածավալ ծրագիր, որը կենթադրի անընդհատ շարունակվող այցեր, աշխատանքներ, ինչն էլ կապահովի մշտական կապ Արցախի հետ:
«Ացի ընթացքում կհանդիպեմ նաև ԱՀ նախկին վարչապետ Արայիկ Հարությունյանի հետ: Այդ հանդիպմանը ևս պատրաստվում եմ քննարկել մի շարք հարցեր: Արայիկ Հարությունյանի կարծիքը ևս շատ կարևոր է մեզ համար, քանի որ նա փորձառու է, տարածաշրջանին ծանոթ, պահանջներին քաջատեղյակ, և կցանկանայինք, որ չլիներ այնպես, որ քայլերը կատարեինք առանց հասկանալու, այլ ավելի արդյունավետ լինելու պատճառով, շփվեինք քաջատեղյակ մարդկանց հետ: Մեզ համար առաջնահերթ է հայրենիքը, նրան օգտակար լինելը և հայրենական ծրագրերը բարեհաջող իրագործելը: Ապրիլյան պատերազմի ժամանակ մենք հասկացանք, որ բազմաթիվ հայեր հայրենիքին օգտակար լինելու ցանկություն ունեն: Եվ հիմա ճիշտ ժամանակն է այդ կամուրջը ստեղծելու»,- նշել է Շ. Պետրոսյանը: