Քաղաքացիական պաշտպանության միջազգային օրվան նվիրված՝ այսօր՝ մարտի 1-ին, ԱՀ ուսումնական հաստատություններում և հանրապետության հանրակրթական դպրոցներում անց են կացվել «Օբյեկտի անձնակազմի գործողություններն արտակարգ իրավիճակների ժամանակ» թեմայով միջոցառումներ:
Քաղպաշտպանության միջազգային օրվան նվիրված` Ստեփանակերտում կազմակերպվել են միջոցառումներ
ՍՏԵՓԱՆԱԿԵՐՏ, մարտի 1, ԱՐՑԱԽՊՐԵՍ: Այսօր առավոտյան Ստեփանակերտի Խաչատուր Աբովյանի անվան N1 հիմնական դպրոցում կրթօջախի ուսուցիչներն ու աշակերտները, լսելով «օդային տագնապ» ազդանշանը, կազմակերպված իջել են ապաստարան և կատարել մի շարք պաշտպանական գործողություններ:
Դպրոցի աշակերտների միջոցով կազմավորվել է հրշեջ-փրկարարական ջոկատ, ովքեր կատարել են հրդեհի մարում, իսկ բուժքույրերի կողմից իրականացվել է առաջին բուժօգնություն:
ԱՀ արտակարգ իրավիճակների պետական ծառայության աշխատակիցները, Ստեփանակերտի քաղաքապետարանի կրթության և սպորտի բաժնի վարիչ Կառլեն Մարգարյանը և դպրոցի պատասխանատուները հետևել են կատարվող գործողություններին, տվել համապատասխան ցուցումներ:
«Արցախպրես»-ի թղթակցի հետ զրույցում Ստեփանակերտի քաղաքապետարանի կրթության և սպորտի բաժնի վարիչ Կառլեն Մարգարյանն ասել է, որ, հաշվի առնելով Արցախի տարածաշրջանի առանձնահատկությունները, կարևոր է դպրոցներում նման միջոցառումների անցկացումը:
«Մեր երեխաները պետք է միշտ պատրաստ լինեն նման իրավիճակներում ճիշտ քայլեր ձեռնարկելուն: Տարվա ընթացքում մենք փորձնական նախաձեռնում ենք տարբեր միջոցառումներ: Քաղպաշտպանության միջազգային օրվա առիթիվ կազմակերպված այս միջոցառումը հավաստեց, որ մանկավարժական կոլեկտիվներն ու աշակերտները պատրաստ են նման վիճակներում իրենց ճիշտ դրսևորել: Ցանկալի կլիներ, որ բոլոր կրթական հաստատություններն ունենային անհրաժեշտ ապաստարաններ»,-ավելացրել է Կ. Մարգարյանը:
Ստեփանակերտի արտակարգ իրավիճակների պետական ծառայության բնակչության և տարածքների պաշտպանության գծով սպա Գոհար Հակոբջանյանը, ով հետևել է քաղպաշտպանության բոլոր գործողություններին, ասել է, որ, ընդհանուր առմամբ, իրենք բավարար են գնահատում կատարված աշխատանքը:
Նա նշել է, որ բոլորն էլ տիրապետում են իրականացվող նորմերին և պարտաճանաչ կատարել են ճիշտ գործողություններ: ԱՀ-ում քաղաքացիական պաշտպանության աշխատանքները պատշաճ մակարդակի վրա են:
«Ամեն տարի մեր գերատեսչությունը կազմակերպում է նման միջոցառումներ՝ նպատակ ունենալով բարձրացնել քաղաքացիների իրազեկվածության մակարդակը: Բնակչությունը պետք է տեղյակ լինի, թե ինչ գործողություններ պետք է իրականացնի «օդային տագնապ»-ի, հրդեհի, երկրաշարժի և այլ արտակարգ դեպքերի ժամանակ: Քաղաքացիական պաշտպանության հիմնական ձևերն են պատսպարվելը, անհատական պաշտպանության միջոցներով ապահովելը և տարահանումը»,-մասնավորապես ասել է պատասխանատուն:
