Վազգենի գործունեության ամենագլխավոր գրավականն ազատագրված, անկախ ու պաշտպանված Արցախն է. եղբայր
ԱՀ պաշտպանության և ԱՀ մշակույթի, երիտասարդության հարցերի և զբոսաշրջության նախարարությունների համատեղ նախաձեռնությամբ այսօր` մարտի 5-ին, Ստեփանակերտի մշակույթի և երիտասարդության պալատում տեղի է ունեցել հուշ երեկո՝ նվիրված հայազգի ռազմական և քաղաքական գործիչ, ՀՀ ազգային հերոս և Արցախի հերոս Վազգեն Սարգսյանի ծննդյան 60-ամյակին:
Վազգենի գործունեության ամենագլխավոր գրավականն ազատագրված, անկախ ու պաշտպանված Արցախն է. եղբայր
ՍՏԵՓԱՆԱԿԵՐՏ, 5 մարտի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ միջոցառմանը բացման խոսքով հանդես է եկել ԱՀ պաշտպանության նախարար Կարեն Աբրահամյանը:
Նա ասել է, որ ընդհանրապես մեծ անհատների մասին խոսելը բավականին բարդ գործ է, նրանց կատարածը, սովորաբար, այնքան հսկայածավալ է լինում, որ ժամանակակիցների հայացքները հաճախ չեն կարողանում այն ընդգրկել: Միայն որոշակի ժամանակահատվածից հետո է հնարավոր լինում ամբողջությամբ իմաստավորել մեծ անհատի պատմական դերը:
«Խոսել Սպարապետ Վազգեն Սարգսյանի մասին՝ նշանակում է հոգեպես հաղորդակցվել մի լեգենդի, մի ազգանվեր մարդու մասին, ով ելել է ժողովրդի ծոցից, ինչպես մի առասպելական հերոս: Նա ծնվել է պատմության և ժամանակի հրամայականով, վաստակել իր հարազատ ժողովրդի անսահման սերն ու հարգանքը և ճամփա բռնել դեպի հավերժություն: Ազգի հորոսի մասին երբեք անցյալ ժամանակով չենք խոսում: Փնտրիր Վազգեն Սարգսյանին և դու նրան կգտնես ամեն հայի մեջ, ում համար թանկ է ազգի ապագան: Փնտրիր Սպարապետին ու դու նրան կգտնես արցախցի մանուկների չարաճճի աչքերում, հայ մտավորականի ստեղծագործություններում, զինվորականի պողպատե հայացքում»,-մասնավորապես ասել է Կ. Առաքելյանը:
Արցախի թեմի առաջնորդ Պարգև Արքեպիսկոպոս Մարտիրոսյանն էլ ասել է, որ իրեն բախտ է վիճակվել ծանոթ լինել Վ. Սարգսյանի հետ դեռևս 1988 թվականից: Նա մի քանի դրվագ է պատմել իր և Սպարապետի հանդիպումներից:
«Վազգենը ֆիզիկապես ամուր ու կենսուրախ մարդ էր: Երբ նա ծիծաղում էր ողջ մարմնով է ուրախությունն արտահայտում: Նա իր ողջ կյանքում ազգին, հայրենիքին, բանակին, պետականությանը, ընկերությանն անմնացորդ նվիրվեց: Սպարապետը փայլել է կյանքի բոլոր ասպարեզներում»,- նշել է Արցախի թեմի առաջնորդը:
ԱՀ գրողների միության նախագահ Վարդան Հակոբյանը, խոսելով Վ. Սարգսյանի գրական-գործունեության մասին, ասել է, որ Վ. Սարգսյանի պատմվածքներն այսօր էլ չեն կորցրել իրենց արդիականությունն ու արվեստի հմայքը:
«Սպարապետի գրած ամեն մի բառն անկրկնելի է, անշփոթելի: Վ. Սարգսյանի փիլիսոփայական մտքերը խորություն ու խորհրդավորություն են տալիս նրա ամեն մի բառին: Ինչպիսին նա էր, այնպիսինն էլ նրա պատմվածքներն են՝ ազնիվ, շիտակ, բարի ու պարզ: Շնորհակալ ենք, որ մենք կյանքում ունեցել ենք Վազգեն Սարգսյան մարդուն և գործչին»,-ավելացրել է Վ. Հակոբյանը:
Միջոցառմանը Սպարապետի եղբայր Արամ Սարգսյանը շնորհակալություն է հայտնել արցախցիներին՝ Վ. Սարգյանի պատիվը միշտ բարձր պահելու և համարժեք գնահատելու համար:
«Շատ կուզենայի, որ Վազգենը այս դահլիճում ներկա լիներ, նրա կողքին էլ մայրս լիներ: Վազգենի կենդանության ժամանակ երբեք չենք գովել իրեն, ընդհակառակը, իր բազմազբաղության մեջ, մենք էլ մեր հերթին հազար ու մի խնդիրներով ծանրաբեռնել ենք նրան, ինչի համար շատ վատ եմ զգում: Վազգենի գործունեության ամենագլխավոր գրավականն ազատագրված, անկախ ու պաշտպանված Արցախն է: Նա իր կյանքն ամբողջությամբ նվիրեց Արցախին: Լինելով գրչի մարդ՝ Սպարապետը շատ արագ հասկացավ, որ հայրենիքը կամքով, նվիրումով, ուժով, զենքով, պարենով են պաշտպանում: «21-րդ դարը մերն է լինելու»,- սա է եղել եղբորս հավատամքը»,-մասնավորապես ասել է Ա. Սարգսյանը:
Հուշ երեկոյին ելույթներն ընդմիջվում էին հայրենասիրական երգերով:
Միջոցառմանը ներկա էին ԱՀ նախագահ Բակո Սահակյանը, ԱՀ երկրորդ նախագահ Արկադի Ղուկասյանը, ՀՀ երրորդ նախագահ Սերժ Սարգսյանը, պետակաան այրեր, զինվորականներ, Սպարապետի զինակից ընկերներ, հարազատներ և հյուրեր: