Հաջորդ այցերի ընթացքում կլինենք նաև գյուղերի բուժկետերում. Արսեն Թորոսյանն ամփոփել է Արցախ կատարած այցը
Եռօրյա աշխատանքային այցի ընթացքում ցանկանում էի անձամբ տեսնել, թե ինչ պայմաններում են գործում բուժաշխատողները, ինչ պայմաններում են բժշկական օգնություն ստանում մեր քաղաքացիները, քանի որ մեզ համար հավասարապես կարևոր է, որ մեր հայրենակիցները ստանան որակյալ բուժօգնություն:
Հաջորդ այցերի ընթացքում կլինենք նաև գյուղերի բուժկետերում. Արսեն Թորոսյանն ամփոփել է Արցախ կատարած այցը
ՍՏԵՓԱՆԱԿԵՐՏ, 6 մարտի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է ՀՀ առողջապահության նախարար Արսեն Թորոսյանը՝ մանրամասնելով, որ այս ընթացքում հանդիպումներ է ունեցել ԱՀ պետական նախարար Գրիգորի Մարտիրոսյանի, առողջապահության նախարար Արայիկ Բաղրյանի, պաշտպանության նախարար Կարեն Աբրահամյանի, Ազգային ժողովի փոխնախագահ Վահրամ Բալայանի և պատգամավորների հետ:
«Այցելել ենք Մարտունու զինվորական հոսպիտալ և հիվանդանոց, Մեխակավանի և Հադրութի զինվորական հոսպիտալներ, այսօր էլ այցելելու ենք Մարտակերտի հիվանդանոց և զինվորական հոսպիտալ: Հադրութի բժշկական կենտրոնում, որտեղ արդեն այցելել եմ երկրորդ անգամ, ծանոթացել ենք մանկաբարձական բաժանմունքի վերանորոգման աշխատանքներին: Կարող եմ ասել, որ դրական առաջընթաց կա: Կարծում եմ՝ մնացած բոլոր բուժհաստատությունները ևս կվերանորոգվեն և կվերազինվեն: Ողջունելի է Ստեփանակերտի Հանրապետական բժշկական կենտրոնում տեսնել մագնիսառեզոնանսային և համակարգչային շերտագրիչների առկայությունը»,- նշել է Ա. Թորոսյանը:
ՀՀ առողջապահության նախարարը վերջին 10 ամսվա ընթացքում երրորդ անգամ է այցելում Արցախ, սակայն կարծում է, որ այցերի պարբերականությունը պետք է ավելի հաճախակի դարձնել՝ ընթացքում ընդգրկելով նաև գյուղական համայնքների բուժակ-մանկաբարձական կետեր այցելությունները:
Անդրադառնալով բժիշկ-մասնագետներով հիվանդանոցները համալրելուն՝ Ա. Թորոսյանն ասել է, որ հարցը քննարկվել է Արցախի գործընկերոջ հետ: Ժամանակային առումով այն դժվար լուծելի խնդիր է:
«Դրա համար անհրաժեշտ է մի քանի եղանակ, այդ թվում՝ բուժաշխատողների աշխատավարձի բարձրացումը, նպատակային ծրագրերը և կլինիկական օրդինատուրայի ուսուցումը: ՀՀ-ում ևս այդ խնդիրն առկա է, սակայն Արցախում ավելի խորն է: Լուծման ևս մեկ եղանակ է բուժքույրական անձնակազմի հզորացումը: Կան բնակավայրեր, որտեղ լավ պատրաստված բուժքույրը կարողանում է կատարել այն աշխատանքը, որն անում է բժիշկը: Ինչ վերաբերում է ՀՀ-ում ծխելու դեմ սկսված պայքարին, ապա նշեմ, որ այս առումով Արցախը ևս պետք է հետևի Հայաստանի օրինակին: Դրան ուղղված մեր գործողությունները պետք է դիտարկել առողջ և երջանիկ հասարակություն ունենալու տեսանկյունից: Առողջության կոմպոնենտներից մեկը այդ վնասակար սովորությունից հրաժարվելն է, որովհետև մեր հիվանդությունների հիմնական պատճառներից բոլորի համար ծխելը ամենաառաջին ռիսկի գործոնն է՝ սիրտանոթային հիվանդությունների, քաղցկեղի և թոքերի օբստրուկտիվ հիվանդությունների դեպքում: Անելու ենք ամեն ինչ, որպեսզի Հայաստանում և Արցախում ավելի քիչ ծխեն: Ներկայումս մեր հիմնական նպատակն է առողջապահության համակարգում ունենալ ուժեղ կանխարգելիչ բժշկություն, համապարփակ ծածկույթ, ֆինանսավորման նոր մեխանիզմ, որը հավանաբար կլինի ապահովագրության տեսքով, և որպես առանձին ուղղություն՝ քաղցկեղի տարածվածության ցածր մակարդակ ու բուժման լայն հնարավորություններ պացիենտների համար»,- ավելացրել է Ա. Թորոսյանը: