«Արարիչ» բարեգործական հիմնադրամի աջակցությամբ «Ճանաչիր քո հայրենիքը» ծրագրի շրջանակներում այսօր Շուշիի տեխնոլոգիական համալսարանի 31 ուսանող եռօրյա այցով մեկնել է Մայր Հայաստան:
Շուշիի տեխնոլոգիական համալսարանի ուսանողները ճանաչողական այցով մեկնել են Մայր հայրենիք
ՍՏԵՓԱՆԱԿԵՐՏ, 7 մարտի, ԱՐՑԱԽՊՐԵՍ:«Արցախպրես»-ի թղթակցի հաղորդմամբ՝ մինչ ուսանողների ճանապարհվելը, նրանց հետ հանդիպել են Շուշիի տեխնոլոգիական համալսարանի հոգաբարձուների խորհրդի նախագահ Արայիկ Հարությունյանը և «Արարիչ» բարեգործական հիմնադրամի հոգաբարձուների խորհրդի նախագահ Կարեն Սարգսյանը:
Ա. Հարությունյանը, ողջունելով ուսանողներին, տեղեկացրել է, որ «Ճանաչիր քո հայրենիքը» ծրագրի նպատակն է խթանել երիտասարդների հայրենաճանաչությունը և միասնականությունը:
Նա նշել է նաև, որ եռօրյա այցելության ծրագիրն առավել քան հագեցած օրակարգ ունի, որն իր մեջ ընդգրկում է այցելություններ պատմամշակութային վայրեր, զբոսանք, հետաքրքիր ժամանց և այլն:
«Արարիչ» բարեգործական հիմնադրամի տնօրեն Նարեկ Ավետիսյանը մեզ հետ զրույցում ասել է, որ ընթացիկ տարվա մարտի 1-ից գործող հիմնադրամն իր գործունեության շրջանակներում փուլ առ փուլ իրականացնում է «Ճանաչիր քո հայրենիքը» ծրագիրը: «Առաջին փուլով Արցախի մի խումբ ուսանողներ այցելել են Դիլիջան: Այսօր արդեն ծրագրի երկրորդ փուլն է մեկնարկում: Ծրագրում ընդգրկվելու են Արցախում գործող բուհերի և քոլեջների ուսանողները»,-ավելացրել է Ն. Ավետիսյանը՝ ընդգծելով, որ հիմնական նպատակն է, որպեսզի արցախցի ուսանողներն էլ ավելի լավ ճանաչեն հայրենի երկիրը:
Նրա խոսքով՝ այցի ընթացքում ուսանողները կլինեն Զվարթնոցի և Սուրբ Հռիփսիմե տաճարներում, Մայր տաճար Սուրբ Էջմիածնում, կլինի շրջայց Երևանում, կդիտեն թատերական ներկայացում և այլն: Ծրագրի շրջանակներում նախատեսվում են հանդիպումներ քաղաքական տարբեր գործիչների, հաջողակ գործարարների հետ:
