Ստեփանակերտի և Երևանի արվեստի դպրոցների սաները հանդես են եկել համերգային ծրագրով (լուսանկարներ)
ԱՀ մշակույթի, երիտասարդության հարցերի և զբոսաշրջության նախարարության հրավերով Ստեփանակերտի Շառլ Ազնավուրի անվան մշակույթի կենտրոնում այսօր Երևանի Սարգիս Բարխուդարյանի և մայրաքաղաքի Հակոբ Գյուրջյանի անվան արվեստի դպրոցների սաները հանդես են եկել համատեղ համերգային ծրագրով:
Ստեփանակերտի և Երևանի արվեստի դպրոցների սաները հանդես են եկել համերգային ծրագրով (լուսանկարներ)
ՍՏԵՓԱՆԱԿԵՐՏ, 8 մարտի, ԱՐՑԱԽՊՐԵՍ: Համերգին դպրոցի սաները հանդես են եկել հայկական և արտասհմանյան երգ ու պարով:
«Արցախպրես»-ի թղթակցի հետ զրույցում Ստեփանակերտի Հակոբ Գյուրջյանի անվան արվեստի դպրոցի տնօրեն Էվելինա Լալայանն ասել է, որ համտեղ համերգային ծրագիրը մի յուրօրինակ ստուգատես է, որը հնարավորություն է տալիս ամփոփել տարվա ընթացքում գեղարվեստական կրթության ոլորտում իրականացրած աշխատանքները, ինչպես նաև վերհանել բացթողումները:
«Մենք նախատեսում ենք փոխադարձ այցելությսւններ: Մշակել ենք ծրագիր, որը նպատակաուղղված կլինի մանուկների և պատանիների գեղարվեստական կրթության և գեղագիտական դաստիարակության բնագավառում անհատի բազմակողմանի ու մտավոր ներուժի զարգացմանը»,-նշել է Է. Լալայանը:
Երևանի Սարգիս Բարխուդարյանի անվան արվեստի դպրոցի տնօրեն Սոնա Գալաջյանի խոսքով՝ նման ձևաչափով միջոցառումների կազմակերպումը նպաստում է արվեստի դպրոցների միջև սերտ համագործակցությանը, փորձի փոխանակմանը, մշակութային կյանքի աշխուժացմանը, ինչպես նաև երեխաների ստեղծագործական ունակությունների և մասնագիտական գիտելիքների կատարելագործմանը:
Ըստ մեր զրուցակցի՝ իրենց սաները երկօրյա այցի ընթացքում հասցրել են լինել նաև Ստեփանակերտի պարարվեստի քոլեջում և այնտեղ անցկացնել վարպետության դասեր, որոնք մեծ խթան են հանդիսանալու երեխաների տեսական ու գործնական գիտելիքների ամրապնդման գործում:
Խոսելով արվեստի դպրոցի մասին՝ Ս. Գալաջյանն ասել է, որ իրենց կրթօջախը շուրջ 45 տարվա պատմություն ունի:
«Դպրոցն ունի 200-ից ավելի սան. նրանք հաճախում են տարբեր բաժիններ: Կրթօջախի սաներն ամեն տարի մասնակցում են տարբեր միջազգային մրցույթների և զբաղեցնում մրցանակային տեղեր»,- հավելել է տնօրենը: