Artsakhpress

Հարցազրույց

Արայիկ Հարությունյանի առաջարկը կարող եմ ասել, որ իրատեսական է. պրոֆեսոր Մարկոսյան

Այցիս ընթացքում Շուշիի տեխնոլոգիական համալսարանում ներկայացրի ՀՀ կառավարության գործունեության ծրագիրը:

Արայիկ Հարությունյանի առաջարկը կարող եմ ասել, որ իրատեսական է. պրոֆեսոր Մարկոսյան

Արայիկ Հարությունյանի առաջարկը կարող եմ ասել, որ իրատեսական է. պրոֆեսոր Մարկոսյան

ՍՏԵՓԱՆԱԿԵՐՏ, 10 մարտի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է Երևանի պետական համալսարանի տնտեսագիտության և կառավարման ֆակուլտետի կառավարման և գործարարության ամբիոնի դասախոս, տնտեսագիտության դոկտոր, պրոֆեսոր Աշոտ Մարկոսյանը:

- Պարո՛ն Մարկոսյան, հագեցած աշխատանքային այց եք ունեցել: Ի՞նչ հարցեր հասցրեցիք քննարկել այս ընթացքում:

- Ինչպես գիտենք, ընթացիկ տարվա փետրվարի 14-ին ՀՀ Ազգային ժողովը հաստատել է կառավարության ծրագիրը, որն ընդգրկում է 2019-2023 թվականները: Նման քայլը օրինաչափ է այն առումով, որ, ըստ էության, առաջիկայում մենք պետք է գնանք երկու հայկական պետությունների տնտեսական քաղաքականությունների ներդաշնակեցմանը: Պետք է թե՛ աճի տեմպերի, թե՛ կոորդինացիայի, թե՛ ինտեգրման և թե՛ տնտեսության կազմակերպման տեսանկյուններից առաջընթաց ունենանք, քանի որ ցավով ենք արձանագրում, որ անցած ժամանակահատվածը բավարար արդյունավետությամբ չենք օգտագործել: Յուրաքաչյուր երկիր պետք է օգտագործի իր բացարձակ և համեմատական կամ հարաբերական առավելությունները, որոնք երկիրը շահեկան դրության մեջ են դնում իր գործընկերների հետ համագործակցության ժամանակ: Սա շատ կարևոր հանգամանք է: Եթե ավելի կոնկրետ խոսենք, ապա Արցախը ունի համեմատական և, հատկապես, բացարձակ առավելություն: Արցախի հնարավորությունները, որոնք արդյունավետ են դարձնում տնտեսության կազմակերպումը, օգտակար են ՀՀ-ի համար և ընդհակառակը: Սրանք փոխլրացնող և մեկը մյուսին շահավետ դարձնող հանգամանքներ են: Համեմատական առավելություն ասելով մենք հասկանում ենք այն, ինչ ազգը ձեռք է բերում ունակությունների, կրթության հիման վրա:

Երկու հայկական պետությունների հնարավորությունների օգտագործումը ավելի մրցունակ է դարձնում հայկական ապրանքների և ծառայությունների արտահանումը: Սա ևս կարևոր հանգամանք է: Կառավարության հնգամյա ծրագիրը հեռանկարային է և այդ ընթացքում պետք է իր մեջ բազմաթիվ նրբերանգներ արտացոլի: Կոորդինացման առումով ծրագրերը պետք է հիմնվեն այն ընդհանուր գծերի ու համեմատական և բացարձակ առավելությունների վրա, որոնք ունեն մեր երկու պետությունները, որոնք միասին վերցրած կարող են դիտարկվել որպես մեկ ամբողջական բացարձակ և համեմատարակ առավելություն՝ հատկապես արտաքին շուկաների տեսանկյունից:

- Երբ ՀՀ վարչապետ Նիկոլ Փաշինյանը «տնտեսական հեղափոխություն» տերմինը կիրառեց, բազմաթիվ հակադարձումներ եղան, որ տնտեսագիտության մեջ այդպիսի տերմին գոյություն չունի: Ձեր կարծիքով այն կարո՞ղ է որպես գաղափար իրականություն դառնալ:

- Սկզբունքորեն դեմ եմ, որ նման տերմին գոյություն չունի: Սոցիալ-տնտեսական զարգացումը կարող է ընթանալ երկու ճանապարհով՝ աստիճանական և արմատական փոփոխությունների: Սրանք մեկը մյուսին հերթագայում են: Գոյություն ունի արմատական հեղափոխության երկու տարբերակ. առաջինը, որը ժխտում է ամեն ինչ և առաջարկում է ամեն ինչ սկսել նոր էջից և երկրորդ հիմնական ճանապարհը, որը գոյություն ունի, երբ արմատական փոփոխություններն արվում են կառուցողական նպատակով՝ ավելի արագացնելու և ավելի արդյունավետ հետևանքներ բերելու տեսակյունից: Շատ կարևոր է նաև պետության կամ կառավարության արդյունավետության բարձրացումը: Առաջիկայում Արցախում ևս սա պետք է կարևորագույն ուղղություն դառնա: Պետք է կարողանալ նաև տնտեսական աճը զուգակցել համաշխարհային զարգացման օրինաչափությունների հետ: Զարգացման ընդհանուր օրինաչափությունը պետք է կարևորագույն սկզբունք (ուղենիշ) հանդիսանա ազգային տնտեսության զարգացման համար: Այստեղ առաջանում է ևս մեկ խնդիր, որը վերաբերում է հատկապես բնակչության զբաղվածության ավելացմանը և մարդկային ներուժի զարգացմանը:

- Պարո՛ն Մարկոսյան, վերջերս Արցախի նախկին վարչապետ Արայիկ Հարությունյանը բաց նամակով դիմել է ՀՀ վարչապետ Նիկոլ Փաշինյանին, որտեղ նշվում է Հայաստանի թռիչքային զարգացման մասին և առաջարկվում մեծացնել արտաքին պարտքի ծավալը: Ձեր կարծիքով ինչքանո՞վ է հիմնավորված հոդվածը և ինչքանո՞վ է ՀՀ կառավարությունն այսօր պատրաստ իրագործելու այն:

- Առաջարկության վերաբերյալ առաջին արձագանքները եղել են դրական, և կարող եմ ասել, որ այն իրատեսական է: Պարզապես այդ ռեսուրսները պետք է օգտագործվեն արդյունավետ: Անհրաժեշտ է ներգրավվող միջոցները ծառայեցնել երկրի տնտեսական զարգացմանը, բնակչության բարեկեցության բարձրացմանը և կյանքի որակի լավացմանը: Աշխարհում չկան պետություններ, որոնք արտաքին պարտք չունեն: Պատճառն այն է, որ արտաքին շուկաներում փողն ավելի էժան է: Նշված առաջարկությունը կառուցված է հենց այս թեզի վրա: Այս տեսանկյունից կարևոր է ներդրումային միջոցներ ունենալը: Պետք է համոզված լինենք, որ միջոցները արդյունավետ են օգտագործվելու, այսինքն՝ ավելացվելու է զբաղվածությունը և ավելանալու են արտահանման ծավալները:

Ինչպես ցույց են տալիս կատարված հետազոտությունները և ուսումնասիրությունները, թե՛ Հայաստանի Հանրապետությունում, թե՛ Արցախի Հանրապետությունում փոքր և միջին ձեռնարկատիրության զարգացման հիմնական արգելքը բավարար ֆինանսական միջոցների պակասն է, որն էլ հանգեցրել է փողի «թանկացմանը»: Հայաստանում և Արցախում կարող են հեղափոխական և արմատական վերափոխումներ կատարվել: Երկու հանրապետությունում էլ տնտեսության արգելակներից հիմնականը ցածր աշխատավարձն է: Անհրաժեշտ է նաև այս խնդիրը լուծել, և այս համատեքստում կարևագույն գործոն է լինելու առաջիկա տարիներին աղքատության հաղթահարումը:

Հարցազրույցը՝ Անի Ավանեսյանի


     

Քաղաքական

Տնտեսական

Հասարակական

Ռազմական

Ամենադիտված

ամիս

շաբաթ

օր

Սամվել Բաբայանը զառանցում է. Վիտալի Բալասանյանը՝ աղմկահարույց սպանությունների մասին

Ռոբերտ Քոչարյանը ազատ կարձակվի. դատարանն ընդունեց կալանքը փոխելու վերաբերյալ երաշխավորությունը

Ի՞նչ նոր քարտեզի մասին է խոսում Սամվել Բաբայանը. Վիտալի Բալասանյանը հրեշավոր է համարում այդ ծրագիրը

Լևոն Հայրապետյանի ծանր օրերին նախագահ Սահակյանն արել է ամեն ինչ՝ հնարավորն ու անհնարինը․ Արշավիր Ղարամյան

Բակո Սահակյանն ու Արկադի Ղուկասյանը երաշխավորեցին Քոչարյանի ազատության համար. նրանք 500.000–ական դրամ են վճարել

Արցախում ապրող ամեն մի ընտնաիքի համար բնակարան ձեռք բերելը կդարձնենք ավելի մատչելի. Արայիկ Հարությունյան

Հայտնի են «Վերջին զանգ»-ի առթիվ կայանալիք տոնական միջոցառումների օրերը

«Էրեբունի» բժշկական կենտրոնի մի խումբ բժիշկներ Ստեփանակերտում իրականացնում են հետազոտություններ

ՀՀ գլխավոր դատախազի հանձնարարությունը

Search