ՍՏԵՓԱՆԱԿԵՐՏ, 12 մարտի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին այսօր՝ մարտի 12-ին կայացած ամփոփիչ մամուլի ասուլիսի ժամանակ ասել է ԱՀ ազգային վիճակագրական ծառայության նախագահ Մանուշ Մինասյանը՝ մանրամասնելով, որ 2018թ.-ի դեկտեմբերին տնտեսական ակտիվության ցուցանիշը, 2017թ.-ի դեկտեմբերի համեմատ, կազմել է 111.8 %, իսկ 2018թ. հունվար-դեկտեմբերին (աճողական), 2017թ. հունվար-դեկտեմբերի համեմատ, 112.1 %:

«Համախառն ներքին արդյունքը 2018 թ.-ին կազմել է 310.2 մլրդ դրամ` 2017թ.-ի 272.1 մլրդ դրամի փոխարեն: ՀՆԱ-ի հավելաճի տեմպը կազմել է 111.9 %, ինդեքս-դեֆլյատորը` 101.9 % (2017թ. համապատասխանաբար 115.6 %-ի և 102.5 %-ի փոխարեն): 2018թ. մեկ շնչին ընկնող ՀՆԱ-ն, ընթացիկ գներով, կազմել է 2103.3  հազ. դրամ դրամ, 4354.7 ԱՄՆ դոլար կամ 3685.3 Եվրո` 2017թ. 1855.9  հազ. դրամի կամ 3844.7 ԱՄՆ դոլարի և 3403.8 Եվրոյի դիմաց: ՀՆԱ-ի արձանագրված 11.9 % հավելաճի տեմպի 5.1 տոկոսային կետն ապահովել են  հանքագործական արդյունաբերությունն ու բացահանքերի շահագործումը, 1.6 տոկոսային կետը` պետական կառավարումը և պաշտպանությունը, պարտադիր սոցիալական սպասարկումը, 1.3 տոկոսային կետը` շինարարությունը և 1.2 տոկոսային կետը` էլեկտրականությունը, գազի, գոլորշու և լավորակ օդի մատակարարումը»,- մասնավորապես նշել է Մ. Մինասյանը:

Նրա խոսքով՝ տնտեսության մեջ արձանագրվող ցանկացած ցուցանիշ գնահատելու համար պետք է հաշվի առնել այն առանձնահատկությունները, որոնք տարիներ շարունակ ուղեկցում են մեր տնտեսությանը:

«Դրանցից կարելի է առանձնացնել ինքնուրույն դրամավարկային քաղաքականության բացակայությունը, տնտեսության կախվածությունը արտաքին աշխարհից, ինչի հիմնավորումը ապրանքների, ծառայությունների մեծաքանակ ներմուծումն է: Տարիներ շարունակ մեր հանրապետության տնտեսության մեջ գերակայող է եղել արդյունաբերությունը, որի մեջ բավական մեծ կշիռ է ունեցել հանքագործական և բաց հանքերի շահագործման ոլորտը: Առանց այն էլ սակավ միջոցները ուղղվում են ոչ միայն տնտեսության զարգացմանը, ենթակառուցվածքների արդիականացմանը, այլ նաև սոցիալական տարաբնույթ ծրագրերի իրականացմանը: Չնայած այն հանգամանքին, որ արդեն 25 տարի է, ինչ կառուցում ենք շուկայական տնտեսություն, սակայն այսօր շուկայական տնտեսության համապատասխան մի շարք ենթակառուցվածքներ, մասնավորապես՝ արժեթղթերի շուկա մենք չունենք, շատ թույլ է զարգացած անշարժ գույքի, ապահովագրության շուկաները, բավական մեծ է նաև ոչ շուկայական ծառայությունների տեսակարար կշիռը»,- ավելացրել է ԱՀ ազգային վիճակագրական ծառայության նախագահը:

Մամուլի ասուլիսին Մ. Մինասյանը պատասխանել է նաև լրագրողների կողմից հնչեցված մի շարք հարցերի: