Artsakhpress

Տնտեսական

Գյուղոլորտի պատասխանատուների կապը թույլ է հողօգտագործողների հետ. նախարար

ԱՀ գյուղատնտեսության նախարարությունում հանրապետության գյուղբաժինների պատասխանատուների, համայնքը սպասարկող գյուղատնտեսների և հողօգտագործողների մասնակցությամբ այսօր կայացել է խորհրդակցություն:

Գյուղոլորտի պատասխանատուների կապը թույլ է հողօգտագործողների հետ. նախարար

Գյուղոլորտի  պատասխանատուների կապը  թույլ է  հողօգտագործողների  հետ. նախարար
ՍՏԵՓԱՆԱԿԵՐՏ, 18 մարտի, ԱՐՑԱԽՊՐԵՍ: «Արցախպրես»-ի  թղթակցի  հաղորդմամբ՝   խորհրդակցությանը  բացման  խոսքով  հանդես  է  եկել  ԱՀ գյուղատնտեսության  նախարար  Ժիրայր  Միրզոյանը:
Խոսելով  «Բուսաբուծության  համալիր  զարգացման»  ծրագրի  մասին, նախարարն  ասել է, որ  պետական  աջակցություն  ստանում  է այն    հողօգտագործողը, ով   գյուղատնտեսությամբ  զբաղվում  է  սահմանված  ագրոտեխնիկական    պահանջներին  համապատասխան, իսկ  այդ պահանջները   թելադրողը  համայնքներում աշխատող մասնագետներն  են:
«Սիրողական  մակարդակով  գյուղատնտեսությամբ  զբաղվողներին արգելվելում է ցուցաբերել  պետական  աջակցություն: Մեր բոլոր   ծրագրերի  հիմքում   3   կարևոր    գաղափարներ  կան՝  ինքնաբավության  մակարդակի  բարձրացում, պարենային անվտանգություն  և  մրցունակ   գյուղատնտեսություն: Յուրաքանչյուր  ոք  պետք  է  իմանա  իր   գործառույթները  և աշխատանքներն  իրականացնի ըստ  պահանջների: Այս  տարի  լուրջ   վերահսկողություն  ենք  իրականացնելու  պետական  աջակցությամբ  տրամադրվող   սերմացուների, պարարտանյութերի, տնկիների   տրամադրման  գործընթացին և դրանց նպատակային  օգտագործմանը: Ստուգումների  ընթացքում  ի  հայտ  եկած  խնդիրների  համար փոխհատուցելու  են հողօգտագործողները»,- մասնավորապես  ասել է  Ժ.  Միրզոյանը՝  նշելով, որ, ցավոք, գյուղոլորտի  պատասխանատուների կապը  թույլ է  հողօգտագործողների  հետ, քանի  որ  մեծ  մասը   տեղյակ  չեն    նախարարության  կողմից  իրականացվող  պետական  ծրագրերին:
Խորհրդակցությանը  գարնանացանի  ընթացքի  և   խնդիրների  մասին   ներկայացրել է ԱՀ  գյուղնախարարի տեղակալ  Վիլեն  Ավետիսյանը:
Նա  ասել է, որ  Կառավարության նպատակաուղղված գործունեության արդյունքում վերջին տարիներին նկատվում է գարնանացան մշակաբույսերի տարածքների ընդլայնման դինամիկա: 2018 թվականին գարնանացան մշակաբույսերի ցանքատարածքները կազմել են ավելի քան 14 հազար հեկտար` գերազանցելով 2005-2007 թվականների միջին տարեկան ցուցանիշը շուրջ 3.5 անգամ:
Վ.  Ավետիսյանը  մասնավորապես ավելացրել է. «Բացի  այդ, ընդլայնվել է նաև գարնանացան մշակաբույսերի տեսակային կազմը:  Մշակության մեջ են դրվել գարնանացան այնպիսի կուլտուրաներ, ինչպիսիք են արևածաղիկը, կտավատը, հլածուկը, սոյան, ոլոռը, ոսպը, սիսեռը, հնդկացորենը, սորգոն, բազմամյա կերային խոտաբույսերից առվույտը և կորնգանը: Վերջիններս, ցանքաշրջանառության լավագույն բաղադրիչ լինելուց բացի,  հանդիսանում են նաև տեխնիկական ու կերային կարևոր կուլտուրաներ, որոնց մշակությունը նախադրյալներ է ստեղծում ագրովերամշակող արդյունաբերության և անասնաբուծության զարգացման համար: Գարնանացանի համար հողի նախապատրաստական աշխատանքները շարունակվում են և, ըստ կանխատեսման, այս տարվա գարնանացան մշակաբույսերի տարածքները կգերազանցի նախորդ տարվա  ցուցանիշներին և այն կհասցվի մինչև 20-22 հազար հա-ի՝ ներառյալ գարնանացան հասկավոր հացահատիկային մշակաբույսերը: Նման կանխատեսումների հիմք են հանդիսանում բուսաբուծության համալիր զարգացման  այս  տարվա  ծրագրի շրջանակներում հանրապետության շրջաններից ներկայացված գարնանացան մշակաբույսերի սերմերի պահանջարկի մասին հայտերը, որը շուրջ 2 անգամ գերազանցում  է նախորդ տարվա հայտերին»:
 
Համայնքը  սպասարկող  գյուղատնտեսների  իրավունքների  և   պարտականությունների   մասին  ելույթով  հանդես  է եկել  նախարարության    բուսաբուծության  և  բույսերի  պաշտպանության  վարչության  պետ  Արամ  Բադալյանը:
Նա   ասել է, որ   ԱՀ   կառավարության  որդեգրած    քաղաքականության  շնորհիվ  վերջին  տարիներին  իրականացվում  են մի  շարք  ծրագրեր, որոնց  նպատակն  է՝  ստեղծել նախադրյալներ  պարենային  ապահովվածության  մակարդակի  շարունակական  բարձրացման, գյուղական   համայնքների  զարգացման, բնակչության  եկամուտների  ավելացման  ու  կենսամակարդակի  բարձրացման  համար, մասնավորապես  մշակվել  է  «Բուսաբուծության  համալիր  զարգացման»  ծրագիր, որի   շրջանակներում  տրամադրվում  է   նռան  տնկիներ, գարնանացան  մշակաբույսերի  սերմերի,  բանջարեղնի  և  կարտոֆիլի  մշակության  դիմաց  անհատույց  գումարի տրամադրում,  ջերմատնային  տնտեսությամբ զբաղվողներին  ֆինանսական  աջակցություն:
 
«Ընդհանուր    գյուղատնտեսության  և  ոլորտում  իրականացվող  ծրագրերի  արդյունավետության  բարձրացման  նպատակով  հանրապետության  շրջանների  վարչակազմերին  հատկացվել  են  38  գյուղատնտես  մասնագետների  հաստիքներ: Գյուղատնտեսական  աշխատանքներն  ագրոտեխնիկական կանոններին  համապատասխան կազմակերպելու  և  ագրոժամկետներում  իրականացնելու  գործում  հիմնական  դերը   պատկանում  է  համայնքները  սպասարկող   գյուղատնտեսներին  և  գյուղբաժնի   մասնագետներին: Մասնագետները,  որպես  պատասխանատու  օղակ  պետք  է  վերահսկեն  և ուղղորդեն  հողօգտագործողներին»,-ավելացրել  է  Ա. Բադալյանը:
 ԱՀ  գյուղնախարարի    տեղակալ  Համլետ Ապրեսյանն  էլ    խոսելով  ոռոգման  խնդիրների  մասին, ասել է, որ  ԱՀ-ն  հարուստ  է  ջրային  ռեսուրսներով, սակայն  դրանք  խիստ  անհավասարաչափ  են  բաշխված  հանրապետության  տարածքում, գյուղատնտեսության  նշանակության   հողատարածքների  մոտակայքում  հիմնականում  չկան  ջրային  մեծ   պաշարներ, իսկ  եղած  պաշարները  տեղափոխող  ոռոգման  ենթակառուցվածքները  գտնվում  են  ոչ  բարվոք  վիճակում:
«2018  թվականին   կատարած    աշխատանքների  արդյունքում  233   հա    անջրդի  հողատարածք ապահովվել  է  ոռոգման  ջրով:    Անցած  տարի  շրջանային  ՓԲ  ընկերությունների   կողմից  իրականացվել  է  82,4  մլն  դրամ  գումարի  չափով  ջրանցքների  մաքրման  աշխատանքներ: Ջրախնայողական  տեխնոլոգիաների  ներդրման   ծրագրով  2018  թվականին  հողօգտագործողներից  ընդունվել    և  հաստատվել է  84  հայտ, որից  բավարարվել  է  51-ը: Կաթիլային  ոռոգման  համակարգ  է   կառուցվել  շուրջ  634,48  հա  հողատարածքների  վրա, որից 513  հա   պտղատու  այգիների,  73,7  հա  բանջարեղենի  և 47,78  հա ծխախոտի  մշակման  համար»,-տեղեկացրել  է    Հ.  Ապրեսյանը:
Խորհրդակցությանը   զեկույցներով  հանդես  են  եկել նաև  «Բույսերի  պաշտպանության   ծառայություն»  ՊՈԱԿ-ի  տնօրեն  Վալերի  Խաչատրյանը  և   «Գյուղի և  գյուղաջակցության  հիմնադրամ»-ի  հողօգտագործողների  բաժնի   պետ   Վալերի  Ղազարյանը, որից  հետո  ներկաները   հանդես  են  եկել   հարցերով  և  առաջարկներով: 

     

Քաղաքական

Տնտեսական

Հասարակական

Ռազմական

Ամենադիտված

ամիս

շաբաթ

օր

Ստեփանակերտում դիմավորել են Եվրոպայի առաջնությունից հաղթանակով վերադարձած սամբիստներին (լուսանկարներ)

Հրազենային վիրավորում ստացած պայմանագրային զինծառայողը մահացել է

Լիբիայի ժամանակավոր կառավարությունը ճանաչեց Հայոց ցեղասպանությունը

Համահայկական խաղերի բացումը կլինի Ստեփանակերտում

Թուրքիայի միակ հայկական գյուղում կբացվի երկրի միակ հայկական թանգարանը

Ստեփանակերտում տեղի է ունեցել Մաղավուզի հանքանյութից ստացված նավթամթերքի շնորհանդեսը (տեսանյութ)

Ստեփանակերտի Աստվածամոր Սուրբ Հովանի Մայր Տաճարի բակում կազմակերպվելու է Սուրբ Զատկի տոնին նվիրված միջոցառում

Ուսուցիչների աշխատավարձերի բարձրացման հարցը քննարկման փուլում է. Նարինե Աղաբալյան

Ադրբեջանի ԱԳՆ-ն դիմել է Հայաստանի ԱԳՆ-ին

Search