ԱՀ կրթության, գիտության և սպորտի, ԱՀ պաշտպանության նախարարությունների և ԱՀ արտակարգ իրավիճակների պետական ծառայության համատեղ նախաձեռնությամբ Ստեփանակերտի մարզադաշտում այսօր ամփոփվել են «Արծվիկ» ռազմամարզական խաղերի հանրապետական փուլի արդյունքները:
«Արծվիկ» ռազմամարզական խաղերում հաղթող է ճանաչվել Ստեփանակերտի թիմը (լուսանկարներ)
ՍՏԵՓԱՆԱԿԵՐՏ, 21 մարտի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ խաղերի արդյունքներով առաջին պատվավոր տեղն զբաղեցրել է Ստեփանակերտի N11, երկրորդը՝ Ասկերանի շրջանի Իվանյանի և երրորդը՝ Հադրութի շրջանի Տումի գյուղի դպրոցների թիմերը:
Մրցանակային տեղեր գրավածները մրցույթի կազմակերպիչների կողմից արժանացել են պատվոգրերի, դրամական խրախուսանքի և նվերների:
Պարգևատրվել են նաև այն աշակերտները, ովքեր տարբեր մրցաձևերում ցուցաբերել են անհատական առաջադիմություն:
Միջոցառմանը ԱՀ կրթության, գիտության և սպորտի նախարարության ռազմահայրենասիրական, ֆիզդաստիարակության և հասարակական կազմակերպությունների հետ կապերի բաժնի պետ Ստեփան Օհանջանյանը շնորհավորել է մրցանակային տեղեր զբաղեցրած թիմերին և նշել, որ առաջին և երկրորդ տեղեր գրավածները պետք է լուրջ վերապատրստվեն և հավուր պատշաճին ներկայանան Երևանում կայանալիք «Կորյուն» ռազմամարզական խաղերին:Նա ասել է նաև, որ անցած տարի Երևանում կայացած խաղերի ժամանակ Ստեփանակերտի N11 և Մարտունու շրջանի Հերհեր համայնքի դպրոցների թիմերը գրավել են երկրորդ և չորրորդ պատվավոր տեղեր:
Ստեփանակերտի N11 դպրոցի զինղեկ Արմեն Դոլուխանյանը մեզ հետ զրույցում ասել է, որ արդեն 7-րդ տարին է, ինչ իրենք գրավում են առաջին տեղը:
«Ավելի քան մեկուկես ամիս երեխաները նախապատրաստվել են մրցույթներին: Նրանք մեծ սիրով ու պատասխանատվությամբ են մասնակցել պարապմունքներին, և յուրաքնչյուրն էլ ձգտել է լինել լավագույնը:Ունենք ուժեղ մրցակիցներ, որը ևս պատճառ է հանդիսանում էլ ավելի հետևողական լինել ամենամյա այս մրցույթում»,-մասնավորապես ասել է Ա. Դոլուխոնյանը՝ նշելով, որ Երևանում կայանալիք «Կորյուն» ռազմամարզական խաղերին մասնակցելու և առաջատար տեղ գրավելու համար իրենք ծավալուն աշխատանքներ են իրականացնելու, քանի որ մրցույթի ծրագիրը լինելու է տարբեր:
