Artsakhpress

Վերլուծական

Հայաստանի ղեկավարները խիստ կեցվածք են ընդունում Միացյալ Նահանգների և Ադրբեջանի դեմ. Սասունյան

Թվում էր, թե այս շաբաթ Հայաստանի արտաքին քաղաքականության ամենանշանակալից զարգացումը պետք է լիներ Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի միջև կայացած առաջին բանակցային հանդիպումը Արցախյան հակամարտության շուրջ:

Հայաստանի ղեկավարները խիստ կեցվածք են ընդունում Միացյալ Նահանգների և Ադրբեջանի դեմ. Սասունյան

Հայաստանի ղեկավարները խիստ կեցվածք են ընդունում Միացյալ Նահանգների և Ադրբեջանի դեմ. Սասունյան
ՍՏԵՓԱՆԱԿԵՐՏ, ապրիլի 3, ԱՐՑԱԽՊՐԵՍ: Սակայն, քանի որ այս բանակցություններում բեկում չգրանցվեց, մեր ուշադրությունը կենտրոնացնենք այլ կարևոր հարցերի վրա:
2019 թ. մարտի 28-ին, ելույթ ունենալով Հայաստանի խորհրդարանում, վարչապետ Նիկոլ Փաշինյանը քննադատության ենթարկեց Միացյալ Նահանգների կառավարության արձագանքի բացակայությունը անցյալ տարվա ժողովրդավարական փոփոխությունների վերաբերյալ, որոնց կնքել են «Թավշյա հեղափոխություն» անվամբ:
Մեկ տարվա ընթացքում Փաշինյանն առաջին անգամ է, որ նման կոշտ լեզվով է խոսում Միացյալ Նահանգները հիշատակելիս։ «Ամերիկայի Միացյալ Նահանգները շատ վաղուց հանդես են գալիս որպես ժողովրդավարության ամենաջերմեռանդ պաշտպան ամբողջ աշխարհում»,  հայտարարեց Փաշինյանը։ «Ուզում եմ Ձեզ և բոլորիս հարց տալ. իսկ Միացյալ Նահանգներն ինչպե՞ս արձագանքեց Հայաստանում տեղի ունեցած աննախադեպ ժողովրդավարական փոփոխություններին, որոնք …. էությամբ ու բովանդակությամբ ժողովրդավարական փոփոխություններ էին ու որևէ մեկը սրանում չի կարող կասկածել: Ես, օրինակ, ԱՄՆ ներկայացուցիչներին էլ եմ ասել՝ համարում եմ, որ իրենք գործնականում զրո արձագանք են տվել, ինչո՞ւ»:
Այնուհետև Փաշինյանը շարունակեց պաշտպանել Հայաստանի անկախ քաղաքական գիծը՝ անտեսելով հզոր պետությունների կողմից Երևանի վրա գործադրված ճնշումները: «Երբ մենք ասում ենք, որ մեզ համար կարևորը մեր երկրի ինքնիշխանությունն է՝ մենք նկատի չունենք, որ կախվածությունը Ա կետից [Ռուսաստան] պետք է փոխարինենք Բ կետից [Միացյալ Նահանգներ]  կախվածությամբ: Մենք ինքնիշխանությանը շատ լուրջ ենք վերաբերվում և ես ձեզ ուզում եմ հավաստիացնել.... որ կառավարությունը նախանձախնդիր է մեր երկրի ու ժողովրդի ինքնիշխանության պաշտպանության հարցում բոլոր ուղղություններով»:
Նախագահ Թրամփի վարչակազմը մինչ օրս միայն խոսքերով է աջակցել Հայաստանում տեղի ունեցած դրամատիկ և խաղաղ փոփոխություններին: Անցյալ տարվա սեպտեմբերին Թրամփը շնորհավորական ուղերձ հղեց Փաշինյանին՝ բարձր գնահատելով «Թավշյա հեղափոխությունը» և պատրաստակամություն հայտնելով օգնել նոր կառավարությանը՝ իրականացնելու լայնածավալ բարեփոխումներ: Նմանապես, պետքարտուղար Մայք Պոմպեոն ողջունեց Հայաստանում տեղի ունեցած «ուշագրավ փոփոխությունները»: Սակայն այդ գեղեցիկ խոսքերը մնացել են թղթի վրա: Հայաստանին օգնելու համար որևէ կոնկրետ քայլ չի ձեռնարկվել: Դա մասամբ պայմանավորված է այն հանգամանքով, որ Թրամփի վարչակազմը անհոգ է օտարերկրյա պետություններում ժողովրդավարական զարգացումների մասին, ինչպես նաև Թրամփի՝ իր սեփական եսի ու անձնական շահերի վրա կենտրոնացած լինելու պատճառով ...
Վարչապետ Փաշինյանի հայտարարությունը շատ դրական զարգացում է Հայաստանի արտաքին քաղաքականության համար և կտրուկ շրջադարձ Հայաստանի նախորդ ղեկավարների դիրքորոշումից: Առայժմ Հայաստանի վրա ճնշումների մեծ մասը գալիս էր Ռուսաստանից: Սա անխուսափելի փաստ է`հաշվի առնելով Հայաստանի տնտեսական, քաղաքական և ռազմական կախվածությունը Ռուսաստանից: Նոր զարգացումն այն է, որ Հայաստանի ղեկավարները այլևս չեն ցանկանում կուրորեն ենթարկվել Ռուսաստանի ցանկություններին և հրամաններին՝ ոտնահարելով երկրի ինքնիշխանությունը: Երբ Հայաստանի շահերը հարցականի տակ էին՝ Փաշինյանը չխուսափեց ոչ Եվրամիությանը քննադատելուց, ոչ Հայաստանի ինքնիշխանության վերահաստատումից՝ Ռուսաստանի նախագահ Վլադիմիր Պուտինի հետ ունեցած քննարկումներում:
Եթե Միացյալ Նահանգները ցանկանում է սիրաշահել Հայաստանին, ապա պետք է «բլիթ» առաջարկի՝ «մտրակի» փոխարեն: Ինչպես ասում են՝ «կարող ես ավելի շատ ճանճ բռնել մեղրով, քան քացախով»...
Անցյալ շաբաթվա երկրորդ ապշեցուցիչ նորությունը Հայաստանի պաշտպանության նախարար Դավիթ Տոնոյանի հայտարարությունն էր Միացյալ Նահանգներ կատարած նրա այցի ընթացքում: «Որպես պաշտպանության նախարար ասում եմ՝ «տարածքներ՝ խաղաղության դիմաց» ձևաչափը ես այսօր վերաձևակերպել եմ՝ «նոր պատերազմ՝ նոր տարածքներ», հայտարարեց  Տոնոյանը Նյու Յորքի հայ համայնքի հետ հանդիպման ժամանակ: «Մենք խրամատային վիճակից, անընդհատ պաշտպանական վիճակից ձերբազատվելու ենք և ավելացնելու ենք այն ստորաբաժանումների թվաքանակը, որոնք կարող են ռազմական գործողությունները տեղափոխել հակառակորդի տարածք», հայտարարեց Տոնոյանը: «Ոչ մի բան չի զիջվելու»:
Թեև ոմանք կարող են Հայաստանի պաշտպանության նախարարի խոսքերը մեկնաբանել որպես ռազմատենչ, սակայն իրականում Տոնոյանը նույն կերպ արձագանքում է Ալիևի տարիներ շարունակ հնչող հազարավոր սպառնալիքներին՝ Մեղրին և նույնիսկ Հայաստանի մայրաքաղաք Երևանը գրավելու մասին: Ժամանակն է, որ Հայաստանի ղեկավարները խոսեն ուժի դիրքերից, ոչ թե թուլության:
Ակնհայտ է, որ Ալիևը պատրաստ չէ պատերազմի, հակառակ դեպքում, նա արդեն հարձակվել էր: Պետք չէ լուրջ ընդունել նրա սպառնալիքները: Անհրաժեշտ է նրան լռեցնել հակադարձ սպառնալիքների միջոցով, իսկ անհրաժեշտության դեպքում՝ նախահարձակումների...
Հայաստանի պաշտպանության նախարարը հստակ ուղերձներ է հղում Ադրբեջանի նախագահին, որպեսզի հիմար նախաձեռնության չտրվի: Հակառակ դեպքում, նրա խողովակաշարերը և նավթահորերը հարձակման կենթարկվեն՝ կործանելով երկրի տնտեսությունը և տապալելով նրա վարչակարգը: Նշանակալից է, որ Հայաստանի պաշտպանության նախարարը նման հզոր ուղերձ է հղում Ադրբեջանին, գտնվելով Միացյալ Նահանգների հողի վրա...
Հարութ Սասունյան՝ «Կալիֆորնիա Կուրիեր» թերթի հրատարակիչ և խմբագիր
Թարգմանությունը՝ Ռուզաննա Ավագյանի

     

Քաղաքական

Հասարակական

Ռազմական

Ամենադիտված

ամիս

շաբաթ

օր

Ստեփանակերտը պատրաստ է ընդունել Մեհրիբան Ալիեւային՝ որպես հյուրի կամ պատվիրակության ղեկավարի

Արցախի Խորհրդարանի ամենամեծ խմբակցությունը միացավ ՀՀ Վարչապետի կոչին

Ադրբեջանը ներկայացրել է ԼՂ հիմնահարցի խաղաղ կարգավորման իր տեսլականը

Չեմ կարծում՝ Մեհրիբան Ալիևան իր այդ կարգավիճակով կարող է գալ Արցախ՝ մուղամ լսելու

Աննա Հակոբյանը Մեհրիբան Ալիևային հրավիրել է Արցախ

Արմեն Սարգսյանը ցավակցական հեռագիր է հղել Վլադիմիր Պուտինին

«Զինվորի կերպարը շահարկելով փորձում են միավորներ հավաքել». Ղարաբաղ Տելեկոմ

Արցախում ոչխարաբուծության զարգացման համար խոշորածավալ ներդրումների ծրագրի հաջող մեկնարկը տրված է. Արայիկ Հարությունյան (տեսանյութ)

Ստեփանակերտի որոշ փողոցներում ժամանակավորապես կդադարեցվի գազամատակարարումը

Search