Ստեփանակերտի Շառլ Ազնավուրի անվան մշակույթի կենտրոնում կազմակերպվել է տոնական համերգ՝ նվիրված մայրության և գեղեցկության տոնին:
Շառլ Ազնավուրի անվան մշակույթի կենտրոնում տեղի է ունեցել տոնական համերգ
ՍՏԵՓԱՆԱԿԵՐՏ, 7 ապրիլի, ԱՐՑԱԽՊՐԵՍ: Միջոցառմանը կենտրոնի «Արցախի բալիկներ» համույթի սաները հանդես են եկել հայրենասիրական և արտասահմանյան երգերով ու պարերով:
Բանաստեղծություններով հանդես է եկել գրականագետ,բանասիրական գիտությունների դոկտոր,պրոֆեսոր Սոկրատ Խանյանը:
«Արցախպրես»-ի թղթակցի հաղորդմամբ՝միջոցառմանը բացման խոսքով հանդես է եկել Հայ առաքելական Սուրբ եկեղեցու քրիստոնեական դաստիարակության և քարոզչության կենտրոնի տնօրեն Տեր Մեսրոպ Խունոյանը,ով իր խոսքում անդրադարձել է տոնի հոգևոր խորհրդին: Նա ասել է, որ ամեն տարի ապրիլի 7-ին Հայ առաքելական Ս. Եկեղեցին նշում է Ս. Մարիամ Աստվածածնի Ավետման տոնը:
«Ամենայն Հայոց Գարեգին Բ Կաթողիկոսն այդ օրը հռչակել է որպես մայրերի ու մայրության բերկրանքին սպասող կանանց օրհնության օր: Բոլոր եկեղեցիներում այդ օրը նրանց համար մատուցվում է Ս. Պատարագ և կատարվում օրհնության կարգ: Մարիամի մայրանալով մարդկանց համար մայրության խորհուրդը նորովի բացահայտվեց և բոլոր կանայք իրենց հղիությամբ կարծես մոտենում են նրան՝ իբրև նոր կյանք պարգևող էակներ»,-մասնավորապես նշել է նա:
Շառլ Ազնավուրի անվան մշակույթի կենտրոնի մշակույթի գծով պատասխանատու, միջոցառման կազմակերպիչ Անահիտ Դանիելյանը մեզ հետ զրույցում ասել է,որ այս տարի համերգին հրավիրել են հիմնականում ուժային կառույցներում աշխատող կանանց և աղջիկներին,ովքեր ապահովում են հասարակության անվտանգությունն ու բարեկեցությունը:
Կարևորելով հայ կնոջ և մոր դերը ազգի դաստիարակության գործում՝ Ա. Դանիելյանը շնորհավորել է նրանց տոնի կապակցությամբ և մաղթել ընտանեկան երջանկություն և բարեկեցություն խաղաղ երկնքի տակ:
