Արցախի խորհրդանիշ հանդիսացող «Մենք ենք մեր սարերը» հուշահամալիրի տարածքում այսօր՝ ապրիլի 13-ին, կազմակերպվել է շաբաթօրյակ:
Բարեկարգվել ու մաքրվել է «Մենք ենք մեր սարերը» հուշահամալիրի տարածքը
ՍՏԵՓԱՆԱԿԵՐՏ, 13 ապրիլի, ԱՐՑԱԽՊՐԵՍ: «Արցախպրես»-ի թղթակցի հետ զրույցում «Քաղաքացիական միացյալ դաշինք» կուսակցության նախագահ Արամ Հարությունյանն ասել է, որ հուշահամալիրի նկատմամբ վերջին շրջանում նկատելի է քաղաքացիների կողմից ոչ պատշաճ վերաբերմունք:
«Շաբաթօրյակը կազմակերպվել է «Քաղաքացիական միացյալ դաշինք» կուսակցության և Շուշիի տեխնոլոգիական համալսարանի նախաձեռնությամբ: «Մենք ենք մեր սարերը» հուշակոթողը կարևոր նշանակություն ունի յուրաքանչյուր արցախցու համար, և մենք պետք է խնամքով պահպանենք այն»,- ավելացրել է Ա. Հարությունյանը:
Ի դեպ, վերջին շրջանում սոցիալական ցանցերում տարբեր քաղաքացիների կողմից տեղադրվել են լուսանկարներ, որտեղ հուշակոթողի հանդեպ անփույթ վերաբերմունքի դրսևորումներ կան:
Արցախցի արվեստագետ, «ԳԱՄ-արտ» Արցախի նկարիչների միջազգային միության նախագահ Ռոբերտ Ասկարյանը խնդրին արձագանքել է ոչ միայն սոցիալական ցանցում, այլ նաև անձամբ նախաձեռնել է հղկել կոթողն ու վերացնել հետքերը (Ստեփանակերտի քաղաքապետարանի հովանավորությամբ):
Մեզ հետ զրույցում Ռ. Ասկարյանն ասել է, որ դեռևս յոթ տարի առաջ նմանատիպ դեպք էր տեղի ունեցել հուշահամալիրի տարածքում, որն ինքն ամբողջությամբ մաքրել էր:
«Արդեն ութ օր է, մաքրում ենք հուշակոթողի վրա առկա բոլոր գրվածքները: Հաճելի է տեսնել, որ մեր քաղաքացիների շրջանում ևս կան մտահոգ մարդիկ, ովքեր օգնում են այդ գործընթացին: Երեկ տարածք են այցելել ԱՀ անվտանգության խորհրդի քարտուղար Վիտալի Բալասանյանը, ոստիկանապետ Իգոր Գրիգորյանը, Ստեփանակերտի քաղաքապետ Սուրեն Գրիգորյանը և այլ պաշտոնատար անձինք:
Հարցը քննարկվել է նաև նրանց հետ, որպեսզի առաջիկայում տարածքում տեղադրվեն տեսախցիկներ: Կարծում եմ՝ սա ոչ միայն զբոսաշրջիկներին Արցախը ճանաչելի դարձնելու վայրերից մեկն է, այլ նաև մեր խորհրդանիշը, որի հետ այսպես վարվելու իրավունք պարզապես չունենք»,- նշել է Ռ. Ասկարյանը:
