Հուշարձանների և տեսարժան վայրերի միջազգային օրվան՝ ապրիլի 18-ին ընդառաջ, Արցախի Հանրապետության մի շարք պատմամշակութային վայրերում կազմակերպվում են շաբաթօրյակներ:
Հուշարձանների և տեսարժան վայրերի միջազգային օրվան ընդառաջ Արցախում կազմակերպվում են շաբաթօրյակներ
ՍՏԵՓԱՆԱԿԵՐՏ, 16 ապրիլի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է ԱՀ մշակույթի, երիտասարդության հարցերի և զբոսաշրջության նախարարության «Պատմական միջավայրի պահպանության պետական ծառայություն» ՊՈԱԿ-ի տնօրեն Արմինե Հայրապետյանը:
Նրա խոսքով՝ առայժմ շաբաթօրյակներ են կազմակերպվել Հադրութի, Մարտունու, Ասկերանի, Մարտակերտի շրջաններում և Ստեփանակերտում. այդ աշխատանքները շարունակվում են:
Ըստ Ա. Հայրապետյանի՝ ԱՀ-ում հաշվառված է ավելի քան 3730 հուշարձան՝ չհաշված Քարվաճառի շրջանը և հանրապետությունում տեղադրված պատմամշակութային նոր կառույցները, որոնց հաշվառման աշխատանքներն ընթացքի մեջ են:
Խոսելով ապրիլի 18-ին կայանալիք միջոցառումների մասին՝ ոլորտի պատասխանատուն ասել է, որ իրենք նախատեսում են ներկայացնել հնագիտական հուշարձանների պեղումների հաշվետվություն, որի ընթացքում տեղի կունենա պարգևատրման արարողություն: Նախատեսվում է նաև հուշարձանների և տեսարժան վայրերի վերաբերյալ Արցախի պետական համալասարանում կազմակերպել դասախոսություն, ինչպես նաև մի խումբ սահմանափակ կարողությունների տեր անձինք էլ կայցելեն պատմամշակութային վայրեր:
