1300 գերանից կառուցված փայտյա կմախք. ինչու կրակն այդքան արագ կլանեց Փարիզի Աստվածամոր տաճարը. Daily Mail-ի անդրադարձը (լուսանկարներ)
Բրիտանական Daily Mail պարբերականն անդրադարձել է Փարիզի Աստվածամոր տաճարի հրդեհին՝ փորձելով հասկանալ՝ որն էր կրակի այդքան արագ տարածվելու և 850-ամյա շինությունը կարճ ժամանակում կլանելու պատճառը:
1300 գերանից կառուցված փայտյա կմախք. ինչու կրակն այդքան արագ կլանեց Փարիզի Աստվածամոր տաճարը. Daily Mail-ի անդրադարձը (լուսանկարներ)
ՍՏԵՓԱՆԱԿԵՐՏ, 16 ապրիլի, ԱՐՑԱԽՊՐԵՍ: Նշվում է, որ Ֆրանսիայի մշակութային և հոգևոր խորհրդանիշն ի սկզբանե կառուցված է եղել 1300 ծառից, ինչն էլ շինության հրավտանգ լինելու գլխավոր պատճառն է, հայտնում է Tert.am-ը:
Ապրիլի 15-ին սկսված հրդեհը կարճ ժամանակում տարածվել է դրա՝ ամբողջովին փայտից կառուցված ներքին սրահում: Այնուհետև փլուզվել է աշտարակներից մեկը:
Պարբերականը մանրամասնում է, որ 850 տարի առաջ կառուցված տաճարի կմախքն ամբողջությամբ գերաններից է:
«Ամեն ինչ այրվում է, կմախքից ոչինչ չի մնա»,-ահազանգել էր տաճարի խոսնակ Անդրե Ֆինոն՝ մանրամասնելով, որ փայտե գերանները նաև տաճարի 35 մ բարձրությամբ տանիքի հիմքն են:
Հայտնի է, որ տաճարի հնացած փայտյա կմախքը տևական ժամանակ մտահոգության առիթ էր տալիս, ուստի իշխանությունները սկսել էին 6,8 մլն եվրո արժողությամբ վերանորոգման ծրագիր, որը պետք է երկարաձգեր պատմական շինության կյանքը:
Ըստ նախնական տվյալների՝ կրակը սկսվել է աշտարակի մոտ, ինչն էլ հիմք է տալիս ենթադրելու, որ դա վերանորոգման աշխատանքների հետևանք է: Այնուհանդերձ՝ իշխանությունները դեռևս չեն հայտնել հրդեհի իրական պատճառը:
Աշխարհի տարբեր անկյուններում բնակվող միլիոնավոր մարդիկ ցավակցել են աշխարհի ամենահայտնի ու գեղեցիկ տաճարներից մեկի ավերման առնչությամբ:
Հիշեցնենք, որ երեկ Փարիզի Աստվածամոր տաճարում խոշոր հրդեհ էր բռնկվել, որի հետևանքով փլվել էր տաճարի աշտարակը: Դեպքի վայր էին ժամանել Ֆրանսիայի նախագահն ու վարչապետը: Հրդեհաշիջման աշխատանքներին շուրջ 400 հրշեջ է մասնակցել: Հրդեհի հետևանքով տաճարը մեծապես տուժել է:
Ֆրանսիայի նախագահ Էմանուել Մակրոնը խոստացել է «աշխարհի մեծագույն տաղանդների օգնությամբ վերակառուցել 850-ամյա տաճարը»: Բացի այդ, նա համազգային դրամահավաք է հայտարարել: