ՀՀ ազգային ժողովի Հայաստան-Ֆրանսիա խորհրդարանական բարեկամության խմբի ղեկավար Վլադիմիր Վարդանյանը հույս ունի, որ Փարիզի Աստվածամոր տաճարի հրդեհը դիտավորության արդյունք չէ:
Հայաստան-Ֆրանսիա խորհրդարանական բարեկամության խմբի ղեկավարը զորակցություն հայտնեց ֆրանսիացիներին Աստվածամոր տաճարի հրդեհի առիթով
ՍՏԵՓԱՆԱԿԵՐՏ, 16 ապրիլի, ԱՐՑԱԽՊՐԵՍ-ԱՐՄԵՆՊՐԵՍ: Նա իր զորակցությունը փոխանցեց Ֆրանսիայի բարեկամ ժողովրդին: Վարդանյանը այս մասին հայտնեց ԱԺ-ի հայտարարությունների ժամանակ:
«Ֆրանսիայի ժողովրդի համար այս մշակութային ողբերգության օրերին որպես Հայաստան-Ֆրանսիա խորհրդարանական բարեկամության խմբի ղեկավար ցանկանում եմ զորակցությունս հայտնել Ֆրանսիայի բարեկամ ժողովրդին: Մեզ համար սա շատ ավելի մտահոգիչ է դառնում` ելնելով նաև այն հանգամանքից, որ ընդամենը մի քանի օր հետո` ապրիլի 22-ին այդ տաճարում պետք է տեղի ունենար Հայոց ցեղասպանության զոհերի հիշատակման պատարագ: Օրեր առաջ Ֆրանսիայի նախագահ Էմանուել Մակրոնը ստորագրել է հրամանագիր, որով ապրիլի 24-ը հռչակել է Հայոց ցեղասպանության զոհերի հիշատակման օր: Մեծ հույս եմ ուզում հայտնել, որ տեղի ունեցածը դիտավորության արդյունք չէր»,-ասաց Վարդանյանը:
Նա նկատեց, որ սակայն տեղի ունեցածը մեզ ևս մեկ անգամ հիմք է տալիս մտորելու, թե ինչպես ենք վերաբերում մեր մշակութային ժառանգությանը: Վարդանյանը մշակութային ժառանգությունը համարեց մեր ինքնության մի մասը: «Մենք մնալու ենք հայ, որովհետև հարգում ու պահպանում ենք մեր մշակութային ժառանգությունը: Մարդ մնալու համար էլ մեզ պետք է նույն եղանակով և նույն միջոցներով հարգել համաշխարհային մշակութային ժառանգությունը: Սա ևս մի կարևոր նշան է, ահազանգ է, որ մենք մի փոքր ավելի լուրջ պետք է վերաբերվենք այն մշակութային ժառանգությանը, որը մեզ դարձնում է այն, ինչ կանք և հնարավորություն է ընձեռում հասկանալ և ընկալել այլ ժողովուրդների մշակութային ժառանգությունը»,-նշեց Վարդանյանն ու հավելեց` որպես բարեկամական խմբի ղեկավար` կփորձի նամակով դիմել ֆրանսիացի իր գործընկերոջը:
Ապրիլի 15-ի երեկոյան Փարիզի Աստվածամոր տաճարում ուժգին հրդեհ էր բռնկվել: Հրշեջ ծառայության աշխատակիցներին հաջողվել է կանխել տաճարի փլուզումը, երբ մինչ աղետը հաշված րոպեներ էին մնացել:
