Ստեփանակերտի մշակույթի և երիտասարդության պալատում այսօր կայացել է Շուշիի Արսեն Խաչատրյանի անվան պետական հումանիտար քոլեջի կիրառական արվեստ և դիզայն բաժիններում սովորող ուսանողների աշխատանքների ցուցահանդես:
Շուշիի հումանիտար քոլեջը կազմակերպել է ցուցահանդես (լուսանկարներ)
ՍՏԵՓԱՆԱԿԵՐՏ, 17 ապրիլի, ԱՐՑԱԽՊՐԵՍ: Ցուցահանդեսին ներկայացվել են կիրառական արվեստ և դիզայն բաժինների՝ կարպետագործության, գորգագործության, կավի, գոբելենի թվով 69 աշխատանքներ:
«Արցախպրես»-ի թղթակցի հաղորդմամբ՝ միջոցառմանը բացման խոսքով հանդես է եկել քոլեջի տնօրեն Ջիվան Հայրապետյանը:Նա ասել է, որ ամեն անգամ, երբ քոլեջը կազմակերպում է նման ցուցահանդեսներ, յուրովի է ներկայանում: Ցուցահդեսին ներկայացվել է նաև հագուստի մոդելավորման բաժնի ուսանողների որոշ աշխատանքներ:
Ըստ Ջ. Հայրապետյանի՝ քոլեջում սովորում է 138 ուսանող, որոնց թիվը տարեցտարի ավելանում է:
Միջոցառմանն ԱՀ մշակույթի, երիտասարդության հարցերի և զբոսաշրջության նախարար Լեռնիկ Հովհաննիսյանը կարևորել է նման ցուցահանդեսների կազմակերպումը:
Նա ասել է, որ առաջընթաց է նկատվում քոլեջի ուսանողների աշխատանքներում:
«Շատ կարևոր է, որ ցուցահանդեսում մեծ տեղ է հատկացված գորգագործությանը, որը խոսում է այն մասին, որ ոչ նյութական մշակութային ժառանգության այս կարևոր ճյուղը վերածնվում է: Նրանով ևս մշակույթում պահպանվում է մեր ժողովրդի ինքնությունը: Շատ ուրախալի է տեսնել նաև հագուստի մոդելավորման բաժնի ուսանողների աշխատանքները: Հույս ունենք, որ հետագայում այդ աշխատանքները կցուցադրվեն նաև այլ վայրերում»,- մասնավորապես ասել է նախարարը:
«Գյուրջյան» կիրառական արվեստի ինստիտուտի ռեկտոր, քանդակագործ Յուրի Հովհաննիսյանն էլ ասել է, որ քոլեջի կողմից կազմակերպվող ցուցահանդեսներում դրական առաջընթաց է նկատվում:«Կրթօջախը, որպես ուսումնական և մշակութային հաստատություն, երիտասարդների շրջանում զարգացնում է արվեստի ճյուղերը, երիտասարդների մոտ դաստիարակում գեղարվեստական ճաշակ: Հայկական կիրառական արվեստի գործերը բազմազան են. այն աշխատատար ճյուղ է, բայց պետք է փաստենք, որ քոլեջի ուսանողների աշխատանքներն աչք շոյող են»,- հավելել է Յու. Հովհաննիսյանը:
Քոլեջի անունը կրող Արսեն Խաչատրյանի 80-ամյա որդի Ռոբերտ Խաչատրյանն էլ ընդգծել է, որ ինքը շատ ուրախ է, որ կրթօջախը կրում է 20-րդ դարի լավագույն մանկավարժ, Արցախի կրթական գործի անխոնջ նվիրյալ իր հոր անունը:
«Հայրս իր ամբողջ կյանքն ու գիտելիքները, հարուստ կենսափորձն անմնացորդ սիրով 51 տարի շարունակ նվիրաբերել է Արցախի երիտասարդ սերնդի ուսումնադաստիարակչական աշխատանքների զարգացմանն ու կատարելագործմանը: Այսօր անսահման ուրախ ու հպարտ եմ, որ քոլեջը ոչ միայն շարունակում, այլ տարեցտարի կատարելագործելով բազմապատկում է կրթօջախի իրավահաջորդը հանդիսացող մանկավարժական ուսումնարանի լավագույն ավանդույթները՝ հաղորդելով նոր բովանդակություն: Այսօրվա յուրօրինակ ցուցահանդեսը հենց դրա վառ ապացույցներից է: Ցուցահանդեսը կարևորում եմ նրանով, որ այնտեղ դրսևորվում է քոլեջի ուսանողների անկոտրուն կամքի, ապագայի նկատմամբ խորը հավատքը: Հուսով եմ, որ քոլեջի ուսանողների աշխատանքներն ապագայում տեղ կգտնեն համաշխարհային քաղաքակրթության գանձարաննեում որպես մշակութային արժեքներ և իրենց նպաստը կբերեն Արցախի միջազգային ճանաչմանը»,-մասնավորապես ասել է Ռ. Խաչատրյանը:
Միջոցառմանը ներկա էին նաև ԱՀ մշակույթի, երիտասարդության հարցերի և զբոսաշրջության նախարարության ներկայացուցիչներ, Շուշիի Ղազանչեցոց Սուրբ Ամենափրկիչ եկեղեցու հոգևոր հովիվ Տեր Անդրեաս քահանա Թավադյանը, արվեստասեր հասարակություն:
