Երկրի համար ռազմավարական նշանակություն ունեցող ոլորտներից է էներգետիկան: Անկախ եւ հուսալի էներգետիկ համակարգի ստեղծումը մեզ համար կենսական եւ ռազմավարական նշանակություն ունեցող նպատակ է:
Ընթացքի մեջ է 16 փոքր հիդրոէլեկտրակայանների կառուցումը
ՍՏԵՓԱՆԱԿԵՐՏ, 17 ապրիլի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին այսօր՝ ապրիլի 17-ին, Խորհրդարանում կայացած լիագումար նիստի ժամանակ ասել է ԱՀ Նախագահ Բակո Սահակյանը՝ ընդգծելով, որ նախորդ տարիներին ձեռնարկված փոքր հիդրոէլեկտրակայանների կառուցման ներդրումային ծրագրերի իրագործման շնորհիվ ներկայումս էներգահամակարգը ամբողջովին բավարարում է էլեկտրաէներգիայի ներքին շուկայի պահանջարկը, եւ առկա է էլեկտրաէներգիայի արտահանման որոշակի ներուժ:
Նախագահի խոսքով՝ կառուցվում են եւս 16 փոքր հիդրոէլեկտրակայաններ, որոնցից 6-ը նախատեսվում է շահագործման հանձնել 2019 թվականին: Էներգետիկ ոլորտում բնապահպանական խնդիրների լուծմանը նպաստելու նպատակով նախատեսվում է փոքր հիդրոէլեկտրակայանների ջրաչափական մշտադիտարկման կենտրոնացված համակարգի ստեղծում, որը թույլ կտա ծրագրի շրջանակներում արդի տեխնոլոգիաների կիրառմամբ իրականացնել ջրօգտագործողների կողմից օգտագործված ջրի քանակության ավտոմատ, առցանց հաշվառում: Միջոցներ են ձեռնարկվել նաեւ արեւային համակարգային կայանների ստեղծման եւ զարգացման համար՝ շարունակելով ոլորտում դիվերսիֆիկացման քաղաքականությունը:
«Ընդլայնվող ծավալներով արտադրվող էլեկտրաէներգիայի անխափան մատակարարումն ու բաշխումը ապահովելու նպատակով ընթացիկ տարի կշարունակվեն հանրապետության բաշխիչ ցանցի արդիականացման, բարձրավոլտ եւ ցածրավոլտ օդային գծերի վերանորոգման, ինչպես նաեւ տրանսֆորմատորային նոր ենթակայանների կառուցման, գազամատակարարման ոլորտում սպասարկման որակի բարձրացման եւ անվտանգ գազամատակարարման ապահովման ուղղություններով իրականացվող աշխատանքները: Էներգետիկայի զարգացմանը զուգընթաց անհրաժեշտ է ձեռնարկել բոլոր միջոցները բնության պահպանման ուղղությամբ, եւ այստեղ պետությունը վարելու է հետեւողական քաղաքականություն»,- նշել է Բ. Սահակյանը:
ԱՀ Նախագահի խոսքով՝ բնապահպանության ոլորտում առկա խնդիրների լուծման նպատակով իրականացվել են մակերեւութային ջրերի որակի ուսումնասիրություններ հանրապետության տարածքի մեծ ու փոքր գետերի եւ վեց ջրամբարի ջրահավաք ավազաններում եւ հարակից տարածքներում, ինչի հիման վրա նախնական գնահատվել է մակերեւութային ջրերի էկոլոգիական վիճակը: Կատարվել են նաեւ կոշտ կենցաղային թափոնների ուսումնասիրություններ Արցախի որոշ շրջանների տարածքներում:
Ընթացիկ տարի այս բնագավառում նախատեսվել է ոչ միայն իրականացվող ծրագրերի շարունակականության ապահովում, այլ նաեւ նոր ծրագրերի մեկնարկ:
