Ստեփանակերտում անց է կացվում «Վերածնունդ» 11-րդ միջազգային մրցույթ փառատոնի եզրափակիչ փուլը
ԱՀ մշակույթի, երիտասարդության հարցերի և զբոսաշրջության նախարարության աջակցությամբ Ստեփանակերտի մշակույթի և երիտասարդության պալատում այսօր անց է կացվում արվեստի «Վերածնունդ» 11-րդ միջազգային մրցույթ փառատոնի եզրափակիչ փուլը, որի մեկնարկը տրվել է ապրիլի 10-ին՝ Երևանում:
Ստեփանակերտում անց է կացվում «Վերածնունդ» 11-րդ միջազգային մրցույթ փառատոնի եզրափակիչ փուլը
ՍՏԵՓԱՆԱԿԵՐՏ, 19 ապրիլի, ԱՐՑԱԽՊՐԵՍ: Փառատոնը նվիրված է Կոմիտասի 150-ամյակին:
Փառատոնի լսումների փուլն անց են կացվում նաև Ստեփանակերտի Սայաթ-Նովայի անվան երաժշտական քոլեջում, Կոմիտասի անվան երաժշտական դպրոցում և Շառլ Ազնավուրի անվան մշակույթի կենտրոնում:
«Արցախպրես»-ի թղթակցի հետ զրույցում ԱՀ մշակույթի, երիտասարդության հարցերի և զբոսաշրջության նախարարության ժամանակակից արվեստի և մշակութային կրթության բաժնի վարիչ Ապրես Մարգարյանն ասել է, որ փառատոնին մասնակցում են Արցախի, Հայաստանի և աշխարհի տարբեր երկրների ներկայացուցիչներ: Ի դեպ, 2018 թվականին փառատոնին մասնակցել է 35 երկիր:
«Արդեն 3 տարի է, ինչ փառատոնի անվանակարգերում ընդգրկվել են նաև կերպարվեստը, պարը և թատրոնը: Այս տարի առաջին անգամ մրցույթի լսումների փուլն անց է կացվում Արցախում: Փառատոնի ընթացքում կազմակերպվում են գիտական կոնֆերանսներ, վարպետության դասեր և այլն»,-ավելացրել է Ա. Մարգարյանը:
«Վերածնունդ» 11-րդ միջազգային մրցույթ փառատոնի համանախագահ, ազգային նվագարանների անվանակարգի հանձնաժողովի նախագահ Գևորգ Նորոյանը մեզ հետ զրույցում ասել է, որ ծրագրի հիմքը դեռևս 11 տարի առաջ է դրվել Գյումրիում:
«Տաս տարի անընդմեջ Արցախի երեխաները հավուր պատշաճի ներկայանում են փառատոնին: Նման միջոցառումները շատ կարևոր է արցախցի երեխաների համար, քանի որ նրանք հնարավորություն են ունենում նոր ճանապարհ հարթելու դեպի արվեստի աշխարհ: Փառատոնի շրջանակներում երեխաները մեկնում են հյուրախաղերի, որտեղ ևս վարպետության դասեր են անցկացվում: Այս փառատոնին Արցախն ամեն տարի իր յուրահատուկ դերակատարությունն է ունենում, և մենք էլ, որպես խրախուսանք, որոշել ենք այս տարի արցախցիներին լսել հենց Արցախում: Փառատոնին Արցախից մասնակցում է ավելի քան 100 երեխա»,-մասնավորապես ասել է Գ. Նորոյանը և հավելել, որ արդյունքների ամփոփումը կլինի ապրիլի վերջին: Առաջին, երկրորդ և երրորդ մրցանակային տեղեր գրավածները կդառնան դափնեկիրներ և կարժանանան դիպլոմների, իսկ լավագույն անհատ կատարողները հյուրախաղերով կմեկնեն արտերկիր: Անցած տարի արցախցի երեխաները եղել են Վիեննայում և Իսպանիայում:
Գ. Նորոյանը տեղեկացրել է նաև, որ այսօր Սայաթ-Նովայի անվան երաժշտական քոլեջում, միջազգային մրցույթների դափնեկիր, գինեսի ռեկորդակիր, աշխարհահռչակ կլառնետահար Յուլիան Միլկիսն անց է կացնելու վարպետության դասեր:
Նշենք, որ «Վերածնունդ» 11-րդ միջազգային մրցույթ փառատոնի եզրափակիչ փուլն ավարտվելու է վաղը՝ ապրիլի 20-ին: