«Չումբո» նախաձեռնող խմբի , «Տարոն» գեղագիտական, «Վանք» և «Շառլ Ազնավուր» մշակութային կենտրոնների համատեղ նախաձեռնությամբ «Երևան-Ստեփանակերտ մշակութային կամուրջ» ծրագրի շրջանակներում Ստեփանակերտի Շառլ Ազնավուրի անվան մշակույթի կենտրոնում կայացել է համերգ:
«Երևան-Ստեփանակերտ մշակութային կամուրջ» ծրագրի շրջանակում Ստեփանակերտում համերգ է կայացել
ՍՏԵՓԱՆԱԿԵՐՏ, 20 ապրիլի, ԱՐՑԱԽՊՐԵՍ: Միջոցառմանը ՀՀ մարզերից և Երևանից մասնակցում էին տարբեր մշակութային կենտրոնների պարային համույթներ:
«Արցախպրես»-ի թղթակցի հետ զրույցում Շառլ Ազնավուրի անվան մշակույթի կենտրոնի մշակույթի գծով պատասխանատու Անահիտ Դանիելյանն ասել է, որ արդեն 3 տարի է, ինչ գործում է ծրագիրը, որի նպատակը Հայաստան-Արցախ մշակութային կապերի ամրապնդումն է:
«Նման ծրագրերը մեծ խթան են հանդիսանում մշակութային կյանքի զարգացման, հայրենաճանաչողության, փորձի փոխանակման առումով: Դրանք նաև հնարավորություն են տալիս մշակութային կենտրոնների սաների միջև ստեղծել բարիդրացիական հարաբերություններ և նպաստել նոր ընկերների ձեռքբերմանը: Լինում են նաև փոխայցելություններ: Վերջերս Արցախից 100 հոգի, որից 45-ը «Արցախի բալիկներ» համույթից հյուրընկալվել են Ծաղկաձորում՝այնտեղ հանդես գալով համերգային ծրագրով: Կարող ենք վստահ ասել, որ այս ծրագրի հիմքում ընկած է «Մեկ ազգ, մեկ մշակույթ» նշանաբանը»,-մասնավորապես նշել է Ա. Դանիելյանը:
