Հադրութի շրջանի Մեծ Թաղեր համայնքում առաջնահերթ լուծման մի շարք խնդիրներ կան՝ գյուղամիջյան ճանապարհների, համայնքի լուսավորվածության ցանցի բացակայության, ոռոգման ջրի և այլն:
Մեծ Թաղեր գյուղում առաջնահերթ լուծման մի շարք խնդիրներ կան. համայնքի ղեկավարի պաշտոնակատար
ՍՏԵՓԱՆԱԿԵՐՏ, 13 մայիսի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է Հադրութի շրջանի Մեծ Թաղեր համայնքի ղեկավարի ժամանակավոր պաշտոնակատար Անդրեյ Ալթունյանը:
Նրա խոսքով՝ գյուղն ունի դպրոց, որտեղ հաճախում է 236 աշակերտ: Դպրոցը հին է, և վերանորոգման կարիք ունի:Մանկապարտեզ հաճախողների թիվը 66 է: Համայնքն ապահովված է բուժկետով, որտեղ աշխատում են Երևանից հրավիրված տեղամասային բժիշկներ:
«ԱՀ պետական բյուջեի միջոցներով վերանորոգվում է գյուղի ակումբը. առաջին փուլով փոխվել է շենքի տանիքը, երկրորդով իրականացվում է ներքին ու արտաքին հարդարման աշխատանքներ, որոնք ավարտելուց հետո տեղի կունենա բացման արարողություն: Ունենք նաև 200 տեղանոց հանդիսությունների սրահ. այն ևս վերանորոգման կարիք ունի: Գյուղը գազաֆիկացված է, ունենք շուրջօրյա ջրամատակարարում: Սկսած 2015 թվականից համայնքում իրականացվում են գյուղամիջյան Ճանապարների սալապատման ծրագիր:
Համայնքում մինչ այժմ կատարվել է ավելի քան 30% սալապատման աշխատանքներ: Շաբաթական երեք անգամ գյուղի բնակիչներն օգտվում են Ստեփանակերտ-Մեծ Թաղեր երթուղուց»,-ավելացրել է համյանքի ղեկավարը:
Ըստ նրա՝ տարեկան գյուղում գրանցվում է 20-40 ծնունդ: 2018 թվականին Մեծ Թաղերն ունեցել է 25 ծնունդ, իսկ 2019 թվականի հունվար-ապրիլ ամիսների ընթացքում՝ 7:
Ա. Ալթունյանը նաև ասել է, որ Մեծ Թաղերում ապրում են բազմազավակ ընտանիքներ, որոնցից 6-ը պետության կողմից պետք է նոր բնակարան ստանա: 2018 թվականին գյուղում մեկ բազմազավակ ընտանիքի համար կառուցվել է բնակարան, իսկ 2019 թվականի մայիսի 10-ին՝ «Թուֆենկյան» բարեգործական հիմնադրամի «Բնակարանային աջակցություն վիրավոր զինվորներին» ծրագրի շրջանակներում համայնքի բնակիչ, Արցախյան ազատագրական պայքարի ընթացքում վիրավորված Նարեկ Ավետիսյանի մեկ սենյականոց անհարմարավետ բնակարանը վերափոխել են 3 սենյականոցի, ինչպես նաև ապահովել անհրաժեշտ բոլոր կենցաղային պայմաններով:
Խոսելով համայնքի բնակիչների հիմնական զբաղմունքի մասին՝ մեր զրուցակիցը տեղեկացրել է, որ նրանք հիմնականում զբաղվում են գյուղատնտեսությամբ, անասնապահությամբ, խոզաբուծությամբ, թռչնաբուծյությամբ: Ի դեպ, համագյուղացի ռուսաստանաբնակ բարերար Պավել Քալաշյանն այս տարի գյուղում հիմնել է 40 հա խաղողի այգի՝ բնակչության մի մասին ապահովելով աշխատանքով:
«Խոշոր անասունների գլխաքնակը գյուղում կազմում է 445, իսկ մանրը՝ ավելի քան 2000, կա նաև ավելի քան 1000 գլուխ խոզ և 3050 թև թռչուն, որոնք հանդիսանում են բնակչության հիմնական եկամտի աղբյուր: Գյուղում կատարվել է 120 հա գարնանացան աշխատանքներ. հիմնականում մշակվում են ցորեն, գարի, քիչ քանակությամբ եգիպտացորեն, արևածաղիկ, ոլոռ, ոսպ և տարբեր կերակուլտուրաներ: Գյուղատնտեսությամբ զբաղվող հողօգտագործողները օգտվում են ԱՀ գյուղատնտեսության նախարարության կողմից պարարտանյութերի, անհատույց սերմերի, արտոնյալ վարկերի, ինչպես նաև դիզվառելիքի սուբսիդավորման տրամադրման տարբեր ծրագրերից»,-մասնավորապես ասել է Ա. Ալթունյանը:
