Այսօր՝ մայիսի 15-ին, «Որոշում քաղաքացիական նախաձեռնություն» հասարակական կազմակերպության նախաձեռնությամբ Ստեփանակերտի մշակույթի և երիտասարդության պալատում կազմակերպվել է «Հայ ավանդական ընտանիք» թեմայով կլոր սեղան՝ նվիրված Ընտանիքի միջազգային օրվան:
Ստեփանակերտում կազմակերպվել է կլոր սեղան՝ նվիրված Ընտանիքի միջազգային օրվան
ՍՏԵՓԱՆԱԿԵՐՏ, 15 մայիսի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ քննարկմանը բացման խոսքով հանդես է եկել ՀԿ նախագահ Արթուր Հայրապետյանը, ով ողջունել է ներկաներին և շնորհավորել տոնի առթիվ: Նա նշել է, որ ընտանիքը՝ որպես հասարակության հիմնական տարր, եղել և մնում է մարդկային արժեքների և մշակույթի պահապանը, կայունության և զարգացման գրավականը:
«Ընտանիքի շնորհիվ ամրանում և զարգանում է պետությունը, բարգավաճում ժողովուրդը: Նրա հիմքն ամուսնությունն է՝ որպես միակ և անբաժանելի կապ՝ տղամարդու և կնոջ միջև: Եկեղեցին ոչ միայն խրախուսում է ամուսնությունը և ընտանիքի կազմումը,այլ նաև հետևում ընտանիք կազմող անձանց հավատարմությանը: Երեխաների հոգևոր և բարոյական կրթության հարցը յուրաքանչյուր ծնողի, հասարակության և պետության առջև ծառացած հիմնական խնդիրներից մեկն է: Կան մի շարք պատճառներ՝ երիտասարդ սերնդի՝ հասարակության մեջ առաջացրած բացասական իրավիճակների առումով:Ընթացիկ ճգնաժամից դուրս գալու մեկ ելք կա՝ ազգային ավանդական ընտանիքի ինստիտուտի քարոզչության ուժեղացում և արմատավորում հասարակության ենթագիտակցության մեջ:Մենք գտնում ենք,որ նախանշվող աշխատանքների վերջնանպատակ պետք է հանդիսանա ընտանեկան ավանդական արժեքների վերականգնումը»,-մասնավորապես ասել է Ա.Հայրապետյանը:
Միջոցառմանը ներկա ԱՀ պաշտպանության բանակի հոգևոր սպասավոր Հրայր սարկավագ Հակոբյանն էլ իր ելույթում նշել է, որ ընտանիքի գաղափարը կապված է պսակի խորհրդի հետ: «Ընտանիքն ամուր պահելու համար ամուսնացողները պետք է իրենց ողջ կյանքի ընթացքում հավատարիմ մնան պսակի արարողության ժամանակ տված խոստմանը: Հայ ազգի համար ընտանիքն ու հայրենիքը սրբություններ են, որ նա պիտի պահպանի ու պաշտպանի արժանապատվորեն:Հայը չպետք է թողնի, որ իր սրբության մեջ մահացու մեղքեր մտնեն, անտարբերություն տիրի և իր զավակներն օտարամոլ դառնան: Մեր զավակների ապագան մեր ձեռքերում է, և եթե ժողովուրդն ու եկեղեցին միասնական լինեն,ապա այդ ժամանակ մեզ հաղթել չի լինի՝ ո´չ մարմնավոր, և ո´չ էլ հոգևոր թշնամու կողմից»,-ասել է նա:
ԱՀ մշակույթի, երիտասարդության հարցերի և զբոսաշրջության նախարարության ազգային փոքրամասնությունների և կրոնի հարցերի բաժնի պետ Աշոտ Սարգսյանն էլ իր խոսքում նշել է, որ պետք է ամեն ինչ արվի , որպեսզի պահպանվի հայ ավանդական կենցաղավարությունն ու ապրելակերպը՝ խուսափելով հանրապետությունում ինչ-որ չափով տիրող եվրոպական մտածելակերպից ու արժեքներից:
Միջոցառմանը ներկաները հանդես են եկել առաջարկներով ու հարցերով:
