Ստեփանակերտի քաղաքապետարանի մշակույթի, երիտասարդության հարցերի և զբոսաշրջության բաժնի նախաձեռնությամբ հունիսի 1-ին՝ ժամը՝ 12:00-ին, մայրաքաղաքի Շառլ Ազնավուրի անվան մշակույթի կենտրոնի բակում կազմակերպվելու է տոնական միջոցառում՝ նվիրված երեխաների պաշտպանության միջազգային օրվան:
Հունիսի 1-ին Ստեփանակերտում նշվելու է երեխաների պաշտպանության միջազգային օրը
ՍՏԵՓԱՆԱԿԵՐՏ, 20 մայիսի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է Ստեփանակերտի քաղաքապետարանի մշակույթի, երիտասարդության հարցերի և զբոսաշրջության բաժնի պետ Կարինե Հարությունյանը:
Նա ասել է նաև, որ իրենք ամեն տարի կազմակերպում են տարբեր միջոցառումներ, որպեսզի երեխաների առօրյան լինի հագեցած և զվարճալի:
Կ. Հարությունյանը տեղեկացրել է նաև, որ նախատեսված ծրագրի համաձայն՝ երեխաներին բաժանվելու են գունավոր կավիճներ, որ կարողանան ասֆալտի վրա նկարել, մուլտհերոսներն էլ իրենց զվարճանքներով ուրախացնելու են փոքրիկներին, իսկ քաղաքապետարանին կից գործող մշակութային օջախների սաները հանդես են գալու համերգային ծրագրով:
«Մեր երեխաները պետք է շրջապատված լինեն հոգատար և բարի մարդկանցով: Մեզանից յուրաքանչյուրն էլ պետք է հոգ տանի մանուկների առօրյան հետաքրքիր ու բովանդակալից դարձնելու համար՝ չխախտելով նրանց իրավունքները և դրսևորելով բարի կամք»,-մասնավորապես ասել է Կ. Հարությունյանը:
