2018 թ.-ին ընդունվել են ԱՀ կառավարության բարեգործական ծրագրերի հանձնաժողովի՝ ծրագրերը բարեգործական որակելու մասին 62 որոշումներ՝ 2 միլիարդ 344 միլիոն դրամ արժողությամբ:
Անցած տարում բարեգործական ծրագրերին տրամադրվել է մոտ 2.5 միլիարդ դրամ
ՍՏԵՓԱՆԱԿԵՐՏ, մայիսի 24, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին այսօր՝ մայիսի 24-ին Խորհրդանաւոմ կայացած 2018 թ.-ի բյուջեի տարեկան հաշվետվությանն ասել է ԱՀ աշխատանքի, սոցիալական հարցերի և վերաբնակեցման նախարար Սամվել Ավանեսյանը՝ մանրամասնելով, որ իրականացվող խոշոր ծրագրերից են Արցախի պետական համալսարանի շենքի կառուցման առաջին փուլը, տարբեր շրջաններում խորքային հորերի հորատման և նոր ոռոգման համակարգի կառուցման աշխատանքները, Ստեփանակերտ քաղաքի երիտասարդական շենքի կառուցման շինարարական աշխատանքները:
Անդրադառնալով «Առանց ծնողական խնամքի մնացած երեխաների սոցիալական պաշտպանության մասին» ԼՂՀ օրենքով սահմանված առանց ծնողական խնամքի մնացած երեխաներին հատկացված 1 սենյականոց բնակարանի կամ բնակելի տան 1 սենյակի չափով առանձնացված բնակելի տարածության կահավորման ծախսերին՝ նախարարն ասել է, որ հատկացվել է 32 միլիոն 500 հազար դրամ՝ 13 շահառուի համար: Նշված ծրագրի ծախսը հաշվետու տարում կազմել է 19 միլիոն 600 հազար դրամ: Կահավորվել են 9 առանց ծնողական խնամքի մնացած երեխաների բնակարաններ:
Իսկ դրամական օգնություն սոցիալապես անապահով քաղաքացիներին և ընտանիքներին ծրագրով ճշտված բյուջեով նախատեսված 101 միլիոն 500 հազար դրամից ծախսվել է 100 միլիոն 500 հազար դրամը: Դրամական օգնություն է ստացել 2508 քաղաքացի՝ 89 միլիոն 500 հազար դրամի չափով: 2418 քաղաքացի՝ 11 միլիոն դրամի չափով ստացել է նյութական օգնություն:
