ՍՏԵՓԱՆԱԿԵՐՏ, 29 մայիսի, ԱՐՑԱԽՊՐԵՍ: «Արցախպրես»-ի   թղթակցի   հաղորդմամբ՝  միջոցառմանը  կազմակերպվել  է  ֆլեշ-մոբ,  որին  մասնակցել  են    հիմնադրամի  կողմից  իրականացվող  «Ճանաչիր   քո  հայրենիքը»      ծրագրի   շրջանակներում   Մայր Հայաստան    այցելած     շուրջ   250  երիտասարդ:

Ֆլեշ-մոբի  արդյունքում    տեսանելի   է   դարձել  «Արարիչ»   գրությունը:

Երկրորդ  մասում   Հադրութի շրջվարչակազմի  աշխատակազմի   մշակույթի  և երիտասարդության  բաժնի    նախաձեռնությամբ   թխվել   է   արցախյան այցեքարտ     հանդիսացող      4մ   26  սմ  երկարությամբ    ժենգյալով  հաց:  

Հադրութի շրջվարչակազմի աշխատակազմի մշակույթի և երիտասարդության հարցերի բաժնի   վարիչ  Երազիկ  Հայրիյանն  ասել է, որ   ուտեստը   պատրաստելու  համար   նախապես   պատրաստվել   է  հատուկ  հարմարանքներ: Հադրութի շրջանում առաջին  անգամ   պատրաստված  2 մետր   83   սմ-անոց  հսկա ժենգյալով հացը, որում  որպես   հումք   օգտագործվել  է    28 բուսատեսակ,  գրանցվել է Հայաստանի «Դյուցազնագրքում»: Երկրորդ  անգամ այն    թխվել  է  Հաթերքում  կայացած   ժենգյալով հացի երկրորդ փառատոնին՝    3մ  3սմ  երկարությամբ:

Աշխարհի  ամենաերկար  ժենգյալով  հացը   կտրելու    պատիվը  տրվել  է  «Արարիչ»   բարեգործական  հիմնադրամի  հոգաբարձուների    խորհրդի  նախագահ  Կարեն  Սարգսյանին:

Միջոցառման  վայրում     առանձին  տաղավարներում  տեղի  է  ունեցել  հյուրասիրություն:

Համերգային  ծրագրին  իրենց  մասնակցությունն  են  ունեցել   Էրիկ Կարապետյանը, Զարուհի Բաբայանը, Հայկոն, Սեդրակ Պապյանը, Մարգարիտա Պոզոյանը, Արսեն  Սաֆարյանը, Լիլիթ   Ավանեսյանը, Ստեփանակերտի պարարվեստի քոլեջի սաները և այլք:

Միջոցառումը  վարել  են  Ավետ  Բարսեղյանը և  Թամարա Պետրոսյանը (Տոմա):

Տոնական    համերգին    «Արարիչ» բարեգործական հիմնադրամի  տնօրեն  Նարեկ  Ավետիսյանն  իր  խոսքում  շնորհակալություն է   հայտնել  բոլոր  այն   անձանց,  որոնց  շնորհիվ  կայացել  է  միջոցառումը:

Հիմնադրամի   տնօրենը   մայիսյան   հաղթանակների   առթիվ     շնորհավորել  է    համայն   հայությանը՝  մաղթելով  հարատև  խաղաղություն  և  երկրի   զարգացում:

Խոսելով   «Արարիչ»  հիմնադրամի  գործունեության    մասին՝    Ն. Ավետիսյանը  մասնավորապես  ասել է. «Հիմնադրամը  ստեղծվել  է  մոտ  3  ամիս  առաջ  մեր  ազգանվեր  հայրենակից  Կարեն  Սարգսյանի  նախաձեռնությամբ, որը  հետապնդում  է  միայն  մեկ  նպատակ՝   ծառայել  հայրենիքին, աջակցել  մեր  հայրենակիցների   այն  գաղափարներին  ու  նախաձեռնություններին, որոնք կնպաստեն  հայրենիքի   զարգացմանն  ու  հզորացմանը: Հիմնադրամն  իր  ստեղծման   ընթացքում    աջակցել  է  մի  շարք  մշակութային,  սոցիալական, կրթական  ծրագրերի:    Մեր  կողմից  իրականացվող   «Ճանաչիր քո հայրենիքը»  ծրագրի  մտահղացումն  առաջացել  է  «Ազատ  Հայրենիք»   կուսակցության  նախագահ  Արայիկ Հարությունյանի  և    «Կապավոր»   ՍՊԸ  խորհրդի   նախագահ  Արման  Հակոբջանյանի   հանդիպման   ընթացքում: Ներկայումս   ծրագրին  մասնակցել  են    Արցախի   բուհերի,  մշակութային   կենտրոնների    շուրջ  350  երիտասարդներ:

Այդ  ծրագրի    եռօրյա  այցի  ընթացքում  երիտասարդները  լինում  են  Երևանում  և  Դիլիջանում, այցելում պատմամշակութային  վայրեր, թնգարաններ, հանդիպումներ  ունենում  քաղաքական  և  բիզնես  ոլորտի  մի    շարք   գործիչների  հետ: Մեր  հիմնադրամը  պատրաստակամ է   աջակցել  այն  բոլոր  ծրագրերին, որոնք  արարելով  զարգացնում  և  հզորացնում  են  հայրենիքը»:

Ֆլեշ-մոբի  մասնակից  Մանվել  Առստամյանը  մեզ  հետ  զրույցում  ասել  է, որ   ինքն   անձամբ  է մասնակցել  «Ճանաչիր քո հայրենիքը» ծրագրին: Նա կարևորել  է  երիտասարդության  շրջանում  նման  միջոցառումների   կազմակերպումը:

«Այսօրվա   միջոցառումը    վկայում  է Արցախի, Հայաստանի  և  Սփյուռքի  մեր հայրենակիցների    միասնության   գաղափարը:  Հայ  ժողովրդի  հաղթանակների  գրավականը  միասնությունն է   ու   իրար   թիկունք  կանգնելը, որն  էլ   այսօրվա   միջոցառման   ասելիքն  է»,-ավելացրել  է  Մ. Առստամյանը:

Շուշիի  տեխնոլոգիական   համալսարանի  ուսանողուհի  Անի  Առաքելյանն  էլ   ասել  է, որ  «Արարիչ»  բարեգործական  հիմնադրամը  կարճ  ժամանակահատվածում  հասցրել  է  Արցախում  իրականացնել   բազմաթիվ  ծրագրեր, որոնցից   լավագույնը    «Ճանաչիր քո հայրենիքը»  ծրագիրն  է:

«Այս  ծրագիրը   ուղղված  է  մատաղ սերնդի  դաստիարակության   գործին, որում   մեծ  դերակատարություն  ունի   հիմնադրամի   հոգաբարձուների  խորհրդի   նախագահ   Կարեն  Սարգսյանը:  Մեր՝  Շուշիի  տեխնոլոգիական  համալսարանի  ուսանաղության  անունից     երախտագիտության   խոսք  եմ  ուղղում  հիմնադրամի աշխատակիցներին»,- մասնավորապես  ասել է  Ա.  Առաքելյանը:

Միջոցառմանը  ներկա  էին   ԱՀ  նախագահ  Բակո  Սահակայնը,  ԱՀ  պետական  նախարար   Գրիգորի  Մարտիրոսյանը,    պետական  այրեր, հյուրեր  և  քաղաքացիներ:

Նշենք, որ «Արցախպրես» լրատվական գործակալությունը տոնական միջոցառումը  հեռարձակել  է   ուղիղ եթերով: